Almatyda túngi janjaldan keıin qylmystyq is qozǵaldy. Qaladaǵy barlardyń biriniń mańynda bolǵan tóbeleste tanymal qazaqstandyq reperge qatysy bar dep kúdiktenýde, dep habarlaıdy infohub.kz saıty.
Tóbeleske qatysy bar degen kúdikke ilingen qazaqstandyq reper Qurt (Damır Koıshýbaev) týraly aqparat Threads áleýmettik jelisinde paıda boldy. «30 tamyzdan 31 tamyzǵa qaraǵan túni, shamamen tańǵy 4-5 shamasynda Fýrmanov, 118 mekenjaıynda sheshendik óner kýrsynyń tyńdaýshysy qatty uryp-soǵyldy. Zardap shegýshiniń jáne kýágerlerdiń aıtýynsha, ony qazaqstandyq reper Qurt, Damır Koıshýbaev urǵan», — delingen @qwertgyassd degen paıdalanýshynyń jazbasynda.
Jarıalanymǵa sáıkes, zardap shegýshi óz tanystarymen, al reper óz adamdarymen barda bolǵan. Keıin eki top arasynda aýyzsha janjal týyp, ol mekeme syrtynda tóbeleske ulasqan. Jazba avtorynyń aıtýynsha, sonyń saldarynan er adam jaraqat alyp, aýrýhanaǵa jatqyzylǵan.
Almaty polısıa departamenti NUR.KZ tilshisine bul derek boıynsha tergeý bastalǵanyn málimdedi. «Osy derek boıynsha Medeý aýdanynyń polısıa basqarmasy qylmystyq is qozǵady. Barlyq qatysýshynyń jeke basy anyqtaldy. Olardy ustaý sharalary qoldanylýda. Tergeý jalǵasýda. Onyń barysy departament basshylyǵynyń baqylaýynda», — dedi vedomstvoda.