Almatyda Qaırat Satybaldyulyna tıesili bolǵan burynǵy qonaq úı ǵımaratynyń taǵdyry anyqtaldy. Ǵımarat buzylmaıdy, kerisinshe jóndeýden ótip, IT-habqa aınalady, dep habarlaıdy infohub.kz.
Buǵan deıin Memlekettik múlik jáne jekeshelendirý departamenti 2023 jylǵy tamyzda syıǵa tartý sharty negizinde qonaq úıdiń memleket kirisine ótkenin, al sol jylǵy qyrkúıekte Sot ákimshiligi departamentiniń balansyna berilgenin habarlaǵan edi. Alaıda jelide ǵımaratty buzýy múmkin degen aqparat tarady.
Almaty qalalyq ákimdigi NUR.KZ tilshisiniń saýalyna jaýap berip, bul qaýesetti joqqa shyǵardy. Onda ǵımarat buzylmaıtynyn, onyń ornyna keshendi jóndeý jumystary júrgizilip jatqanyn málimdedi. Atap aıtqanda, ǵımarattyń qasbeti, tereze oıyqtary, ishki bólmeleri qalpyna keltirilip, irgeles aýmaq abattandyrylýda. Kúrdeli jóndeýden keıin ǵımarat paıdalanýǵa beriledi.
Jobanyń ınvestory — «LeanQor» JSHS. «Almaty» ÁKK» AQ jumystardy júrgizý úshin ǵımaratty usynsa, qarjylandyrý ınvestordyń menshikti qarajaty esebinen júzege asyrylady. Joba memleket basshysynyń IT jáne AI ınfraqurylymyn damytý, kadrlar daıarlaý jáne osy salalardaǵy quzyretterdi arttyrý jónindegi tapsyrmasyna sáıkes júzege asyrylýda.
Ákimdikte qalanyń zamanaýı nysandarǵa degen qajettiligin eskere otyryp, bos turǵan ǵımaratty buzbaı, paıdalaný týraly sheshim qabyldanǵanyn túsindirdi. Joba aıaqtalǵannan keıin ǵımarat jer telimimen birge «Almaty qalasynyń sıfrlandyrý basqarmasy» komýnaldyq memlekettik mekemesine beriledi. Nysan sıfrlandyrý jáne jasandy ıntellekt salasyndaǵy memlekettik baǵdarlamalardy iske asyrý, sondaı-aq IT, AI, kreatıvti ındýstrıa jáne sabaqtas baǵyttardaǵy rezıdentterdi ornalastyrý úshin paıdalanylatyn bolady.
Eske sala keteıik, 2022 jylǵy qyrkúıekte sot Qaırat Satybaldyulyn urlyq isi boıynsha kináli dep tanyp, ony alty jylǵa bas bostandyǵynan aıyrdy. Keıin oǵan merziminen buryn shartty túrde bosatýdan bas tartyldy. 2024 jylǵy sáýirde Astanada Satybaldyulynyń isi boıynsha jańa sot bastalyp, onyń Reseıdegi, BAÁ-degi, Fransıadaǵy jáne Qazaqstandaǵy múlki qaraldy. Satybaldyuly memleketke jyljymaıtyn múlik pen lúks avtokólikterdi qaıtarýǵa kelisti. Antıkordyń dereginshe, onyń isi boıynsha taǵy 50 mlrd teńge qaıtarylady, al Bas prokýratýra bul somaǵa múlik memleketke qaıtarylatynyn habarlady.