Almatyda «Sofıa» turǵyn úı kesheniniń turǵyndary ystyq sý máselesin sheshýdi talap etip, túngi narazylyq aksıasyna shyqty. Oqıǵa ornynan túsirilgen vıdeo kris__p__kaz Instagram paraqshasynda jarıalandy, dep habarlaıdy infohub.kz saıty.
Vıdeo sıpattamasynda aıtylǵandaı, Almatynyń Alataý aýdanyndaǵy «Sofıa» turǵyn úı kesheniniń turǵyndary ystyq sýmen jabdyqtaý máselesine nazar aýdarýdy talap etti.
Almaty ákimdigi jaǵdaıǵa qatysty túsinikteme berdi. Baspasóz qyzmetiniń málimetinshe, Alataý aýdanyndaǵy «Sofıa» turǵyn úı kesheninde 11 qyrkúıekte ystyq sýmen jabdyqtaýda úzilis bolǵan. Sebebi — múlik ıeleri birlestigi (MIB), basqarýshy kompanıa jáne energıamen jabdyqtaýshy uıym arasyndaǵy qaryz ben sheshilmegen kelisimshart máseleleri.
Ákimdik aralasqannan keıin qazandyqtyń jumysy men ystyq sý berý sol kúni 23:20-da qalpyna keltirildi. Qolda bar aqparatqa sáıkes, turǵyndardyń elektr energıasy boıynsha jalpy qaryzy 24,83 mln teńge, taǵy shamamen 7 mln teńge avtonomdy qazandyqtyń jumysyna tıesili. MIB málimetinshe, jeke qazandyq elektr energıasyn turǵyn úı kesheniniń jelileri arqyly alady, biraq ony elektrmen jabdyqtaýǵa jeke kelisimshart jasalmaǵan.
Turǵyndar shaǵymdanǵan soń oqıǵa ornyna Alataý aýdany ákimi apparatynyń jáne Almaty ákimdiginiń beıindi basqarmalarynyń ókilderi jedel keldi. MIB, «Volden V» JSHS basqarýshy kompanıasy jáne energıamen jabdyqtaýshy uıymmen birlesip, jaǵdaıdy retteý jáne ystyq sýmen jabdyqtaýdy qalpyna keltirý jumystary júrgizildi.
Qazirgi tańda qazandyq qalypty rejımde jumys istep tur. Almaty ákimdigi jaǵdaıdy baqylaýda ustaýdy jalǵastyrýda. Taraptar qaryz ben kelisimsharttyq qatynastar máselelerin zańnamada belgilengen tártippen pysyqtaýda.