Almatyda bıylǵy jyldyń sáýirinde aıaldama kesheninde áıelge shabýyl jasaǵan er adamǵa úkim shyǵaryldy. Sot ony bir jylǵa bas bostandyǵynan aıyrdy, dep habarlaıdy infohub.kz saıty.
Sot kabınetinde jarıalanǵan is materıaldaryna sáıkes, T. dep belgilengen aıyptalýshy jábirlenýshiniń basyna, betine jáne denesine birneshe ret soqqy bergen.
«T. 2026 jylǵy 23 sáýirde saǵat 06.10 shamasynda Qarǵaly shaǵyn aýdanyndaǵy Sanatornaıa kóshesinde ornalasqan aıaldama kesheninde buzaqylyq nıetpen, G.-nyń shabýyl kútpeıtinin jáne belsendi qarsylyq kórsete almaıtynyn paıdalanyp, oǵan eki qolynyń judyryǵymen basy men betine 5-6 ret soqqy berdi. Sondaı-aq aıaǵymen denesi men basyna 2-3 ret tepti, osylaısha buzaqylyq nıetpen oǵan jeńil densaýlyq zıanyn keltirdi», — delingen úkimniń sıpattama bóliginde.
Sot otyrysy barysynda aıyptalýshy kinásin tolyq moıyndap, ókindi. Sot ony kináli dep tanyp, bir jylǵa bas bostandyǵynan aıyrý jazasyn taǵaıyndady. Jazasyn eń joǵary qaýipsizdiktegi qylmystyq-atqarý júıesi mekemesinde óteıdi.
Sonymen qatar sot jábirlenýshiniń talap-aryzyn qanaǵattandyrdy. Nátıjesinde sottalǵan adam oǵan materıaldyq jáne moraldyq zıandy, sondaı-aq sotta ókildik etý shyǵyndaryn óteý retinde 1,5 mln teńgeden astam tóleýge mindetteldi.
Eske salaıyq, 23 sáýirde Almatynyń bir aıaldamasynda 68 jastaǵy áıelge er adam shabýyl jasaǵany belgili boldy. Ol áıelge birneshe ret soqqy bergen. Polısıa qylmysty izin sýytpaı ashqanyn málimdedi. Kúdikti ustalyp, ýaqytsha ustaý ızolátoryna qamaldy.
Sondaı-aq áıelge medısınalyq kómek kórsetilip, mıyna kompúterlik tomografıa jasalǵany habarlandy. Tekserý nátıjesinde mı qan aınalymynyń jedel buzylýy men mıdyń soǵylý belgileri anyqtalmady.
Buǵan qosa, shabýyldaýshynyń buryn sottalǵany belgili boldy: ol úıine kelgen er adamdardyń birine pyshaq salyp, ekinshisine aýyr densaýlyq zıanyn keltirgen. Sot T.-ny qorǵandy dep sheship, oǵan 2 jylǵa bas bostandyǵynan aıyrý jazasyn taǵaıyndaǵan.