Almaty SuperSki jobasynyń jerleri erekshe qorǵalatyn tabıǵı aýmaqtar quramynan shyǵarylmaıdy, ári bul aýmaqta jeke vıllalar men kotejder salý qarastyrylmaǵan. Bul týraly Kazakh Tourism Development kompanıasynyń bas atqarýshy dırektory Erjan Erkinbaev málimdedi, dep habarlaıdy infohub.kz saıty.
Onyń aıtýynsha, qazirgi joba on jyl burynǵy bastamadan túbegeıli ózgeshe. Ol kezde almatylyqtardyń narazylyǵyn týdyryp, aqyry jobadan bas tartylǵan bolatyn.
«10 jyl buryn halyqty úsh nárse alańdatty. Birinshiden, jer ulttyq park quramynan shyǵarylyp, JSHS balansyna berildi. Ekinshiden, joba kóptegen jeke vılla salýdy kózdedi. Úshinshiden, shatqaldy qorshap, halyqtyń kirýine tyıym salynady degen qatty alańdaýshylyq boldy», — dedi Erjan Erkinbaev.
Búginde, spıker atap ótkendeı, halyqty alańdatqan úsh sebep te joıyldy. Jer erekshe qorǵalatyn tabıǵı aýmaq quramynda qalady jáne eshkimniń balansyna berilmeıdi.
«Vıllalarǵa qatysty barlyq qujatta aýmaqta jeke kotejder men vıllalar bolmaıtynyn bekittik. Al taý shańǵysy kýrortyn qorshaýǵa eshkim nıettenip otyrǵan joq», — dedi Kazakh Tourism Development bas atqarýshy dırektory.
Erjan Erkinbaevtyń aıtýynsha, ulttyq parkpen yntymaqtastyq birlesken qyzmet týraly shart negizinde júzege asyrylady. Aýmaqty damytý qajetti ınfraqurylymdy, onyń ishinde kólik jáne týrısik nysandardy, sondaı-aq densaýlyq saqtaý jáne bilim berý mekemelerin salýdy kózdeıdi.
Sondaı-aq ol erekshe qorǵalatyn tabıǵı aýmaqtardyń jerlerin týrısik nysandar salý úshin shyǵarý múmkindigi búgingi zańnamada qarastyrylmaǵanyn atap ótti.