Almaty taý klasteri jobasy aıasynda tabıǵı aýmaqqa áser etý jergilikti sıpatta bolady jáne İle-Alataý memlekettik ulttyq tabıǵı parkiniń shaǵyn bóligin ǵana qamtıdy. Bul týraly Almaty qalasy ákimdiginiń baspasóz qyzmeti habarlady, dep jazady infohub.kz saıty.
İle-Alataý memlekettik ulttyq tabıǵı parkiniń jalpy aýdany 200 myń gektardan asady. Jobany ázirleýshilerdiń málimetinshe, Almaty taý klasterin iske asyrý sheńberinde qamtylatyn aýmaq ulttyq parktiń jalpy aýdanynyń 0,049%-yn quraıdy.
Osylaısha, sóz ulttyq park aýmaǵyn keń kólemde ıgerý týraly emes, shekteýli ýchaskelerge áser etý týraly bolyp otyr. Infraqurylymdy jobalaý kezinde aýmaqtyń tabıǵı erekshelikteri, qalyptasqan júkteme jáne qorshaǵan ortaǵa áserdi azaıtý qajettigi eskeriledi.
Jasyl qordy saqtaý men qalpyna keltirýge erekshe kóńil bólinedi. Zańnama talaptaryna sáıkes, joba qamtıtyn aýmaqtyń ornyna jasyl ekpelerdi ótemaqy retinde otyrǵyzý kózdelgen. Qalpyna keltirý sharalary ınfraqurylymdyq sheshimderdi iske asyrý aıasynda kezeń-kezeńimen júrgiziledi.
Sonymen qatar, taý klasteri — bul tek aspaly joldar men taý shańǵysy trassalary ǵana emes. Bul qaýipsiz marshrýttardy, zamanaýı ınfraqurylymdy, ınjenerlik qamtamasyz etýdi, ekologıalyq sheshimderdi jáne taýlardy jyl boıy barýǵa jaǵdaı jasaýdy qamtıtyn tutas taý týrızmi júıesin qurý.
Mundaı tásil jekelegen nysandardy bólek-bólek damytýdan taý aýmaǵyn júıeli basqarýǵa kóshýge múmkindik beredi, munda ınfraqurylymdyq sheshimder tabıǵı erekshelikter men landshaftty saqtaý qajettigin eskere otyryp josparlanady.
Taýlardy damytý adamdar úshin jańa múmkindikter týǵyzýy kerek, biraq taýlardyń tabıǵı qundylyǵyn tómendetpeı. Almaty taý klasteriniń tujyrymdamasy dál osy qaǵıdatqa negizdelgen.