Almaty mańyndaǵy taýlarda Shúkir sarqyramasynyń janynda aıaǵyn burap alyp, tómen túsýdi óz betimen jalǵastyra almaǵan 16 jastaǵy qyzǵa qutqarýshylar kómekke keldi, dep habarlaıdy infohub.kz saıty.
Qazaqstan Respýblıkasy Tótenshe jaǵdaılar mınıstrliginiń málimetinshe, oqıǵa Bostandyq aýdanynda shamamen 2650 metr bıiktikte bolǵan. Qyz jaraqat alyp, ári qaraı júre almaǵandyqtan, qutqarýshylardyń kómegi qajet boldy.
TJM «Barys» respýblıkalyq qutqarý qyzmetiniń qutqarýshylary berilgen koordınattar boıynsha oqıǵa ornyna attandy. Zardap shekken qyzǵa jetip, olar oǵan alǵashqy kómek kórsetti jáne qaýipsiz túsirýdi uıymdastyrdy.
Sodan keıin qyzdy ata-anasy kútip turǵan jerge deıin alyp tústi. Onda zardap shekken qyz jedel járdem brıgadasyna tapsyryldy.
Uqsas taǵy bir oqıǵa Almaty oblysynyń taýlarynda boldy. Qarasaı aýdanynda «Terra» alańynyń mańynda 2600 metr bıiktikte Almaty qalasynyń Monıtorıń jáne jedel den qoıý ortalyǵynyń qutqarýshylary 2006 jyly týǵan azamatqa kómek kórsetti.
Taýdan túsý kezinde jas jigit te aıaǵyn burap alyp, óz betimen júre almady. Qutqarýshylar ony Prohodnoı shatqalyna deıin túsirip, Qazaqstan Respýblıkasy TJM Apat medısınasy ortalyǵynyń brıgadasyna tapsyrdy, sodan keıin zardap shekken jigit qalalyq aýrýhanaǵa jetkizildi.