Almatyda travmatologıa jáne ortopedıanyń óńirlik ortalyǵy jumysyn bastady. Ol megapolıs pen Almaty oblysynyń medısınalyq qyzmetterin biriktiredi. Mekeme №4 qalalyq klınıkalyq aýrýhanasynyń bazasynda ashyldy, dep habarlaıdy infohub.kz saıty.
Densaýlyq saqtaý mınıstrliginde atap ótkendeı, endi Almaty men oblys turǵyndary aýyr jaraqattar alǵan jaǵdaıda mamandandyrylǵan jáne joǵary tehnologıalyq kómekti tolyq sıklmen ala alady. Bul shuǵyl qabyldaýdy da, kúrdeli hırýrgıalyq operasıalardy da qamtıdy. Sonymen qatar, munda ońaltý sharalary da júrgiziledi.
«Mundaı ortalyqtyń qalada paıda bolýy Almaty men Almaty oblysynyń travmatologıalyq qyzmetteriniń tıimdiligi men úılesimdiligin arttyrýǵa múmkindik beredi», – dep atap ótti vedomstvoda.
Akademık Batpenov atyndaǵy Ulttyq travmatologıa jáne ortopedıa ǵylymı ortalyǵynyń dırektory Oljas Bekarısov óńirlik travmatologıalyq ortalyqtardyń Astanada (UTOǴO bazasynda), Qaraǵandyda (profesor H.J. Maqajanov atyndaǵy kópbeıindi aýrýhana bazasynda) jáne Balqashta jumys istep turǵanyn atap ótti. «Almatydaǵy jańa ortalyq búkil ońtústik óńir úshin negizgi býynǵa aınalady», – dep qosty ol.
Buǵan deıin 2026 jyldyń basynan bastap elimizde 403 tósek-orynǵa arnalǵan 26 jańa beıindi bólimshe ashylǵany habarlanǵan bolatyn. Densaýlyq saqtaý mınıstrliginiń málimetinshe, olar kardıologıa, gastroenterologıa, nefrologıa, pýlmonologıa, revmatologıa, endokrınologıa jáne gematologıany qamtıtyn jeti baǵyt boıynsha jumys isteıdi. Aǵymdaǵy jyldyń sońyna deıin 30-dan astam aýdandyq aýrýhanany kópbeıindi deńgeıge deıin qaıta jaraqtandyrý josparlanýda.