Almatyda Tuńǵysh Prezıdent saıabaǵy kelýshiler úshin ýaqytsha jabylady. Bul — aýmaqta jóndeý jumystarynyń júrgizilýine baılanysty, dep habarlaıdy infohub.kz.
Almaty ákimdiginiń málimetinshe, megapolıste Tuńǵysh Prezıdent saıabaǵyn rekonstrýksıalaý jumystary jalǵasýda. Osyǵan oraı qurylys-montaj jumystary júrip jatqan kezeńde saıabaq aýmaǵy kelýshiler úshin tolyǵymen jabylady.
Rekonstrýksıa aıasynda ınjenerlik jáne jol-jaıaý júrginshiler ınfraqurylymyn jańartý, aýmaqty keshendi abattandyrý jáne kógaldandyrý josparlanýda.
Rekonstrýksıa kezeńinde qala turǵyndary men qonaqtary jaqyn ornalasqan Flow Park saıabaǵyna bara alady. Oǵan irgeles aýmaqtardy jalǵaıtyn jaıaý júrginshiler kópiri arqyly jetýge bolady.
Jumystardyń aıaqtalý merzimi men saıabaqtyń ashylý kúni týraly qosymsha habarlanady. Ákimdik azamattardy serýendeýdi josparlaý kezinde ýaqytsha shekteýdi eskerýdi suraıdy.
Eske salaıyq, buǵan deıin saıabaqty ózgertý josparlary, onyń ishinde shamamen 150 beınebaqylaý kamerasyn ornatý týraly habarlanǵan bolatyn. Sondaı-aq saıabaq 2010 jyldan beri jóndelmegeni jáne ony kezeń-kezeńimen jabý josparlanǵany aıtylǵan. Keıin rekonstrýksıa kezinde Nursultan Nazarbaevtyń eskertkishi demontajdalatyny belgili boldy.