Almatyda Kabanbaı batyr men Panfılov kósheleriniń qıylysynda túrli-tústi erekshe belgiler paıda boldy, dep habarlaıdy infohub.kz.
Kris.p.media Telegram-arnasynda jarıalanǵan aqparatqa sáıkes, geometrıalyq fıgýralarmen bezendirilgen bul belgiler almatylyqtardyń tańdanysyn týdyrdy.
Arnada jarıalanǵan vıdeo sıpattamasynda: "Júrgizýshiler bul belgilerdiń ne úshin qajet ekenin, olarmen júrýge jáne tipti turaqqa qoıýǵa bolatynyn boljaı almaı otyr. Bir jaǵynan tutas syzyq, ekinshi jaǵynan tyıym salatyn belgiler joq. Bul erekshe kórinedi", - delingen.
Qala ákimdigi bul belgilerdiń maqsatyn túsindirdi.
Almaty qalasynyń jol qozǵalysyn uıymdastyrý jáne jolaýshylar kóligi basqarmasynyń málimetinshe: "Panfılov kóshesi mańyndaǵy qaýipsizdik aralyna túrli-tústi belgiler osy ýchaskeniń kórinýin arttyrý úshin salynǵan. Ol júrgizýshiler men jaıaý júrginshilerdiń nazaryn aýdaryp, jol bóligine jaqyndaǵanda jaqsy baǵdarlaýǵa jáne muqıat bolýǵa kómektesedi. Negizgi maqsat - barlyq jol qozǵalysy qatysýshylarynyń qaýipsizdigin arttyrý. Aıta ketý kerek, belgiler qazirdiń ózinde bar qaýipsizdik aralynyń sheginde salynǵan. Jol bóligi tarylǵan joq, onyń parametrleri men ótkizý qabileti ózgergen joq. Jobanyń mańyzdy mindetteriniń biri - qaýipsizdik aralynda kólik quraldarynyń toqtaýy men turaqqa qoıylýynyń aldyn alý. Ashyq tústi bezendirý bul aımaqtyń fýnksıonaldyq maqsatyn kórneki túrde erekshelep, jol qozǵalysyn uıymdastyrý talaptarynyń saqtalýyna yqpal etedi".