Almatyda Balalar shuǵyl medısınalyq kómek ortalyǵynyń dárigerleri jańa týǵan qyz balaǵa kúrdeli ota jasap, salmaǵy 2 kg isikti alyp tastady. Bul balanyń dene salmaǵynyń jartysyn quraǵan, dep habarlaıdy infohub.kz saıty.
Sábı 18 tamyzda júktiliktiń 34-aptasynda segizkóz-quıymshaq aımaǵyndaǵy isikpen dúnıege keldi. Týylǵan kezde qyzdyń salmaǵy 4 kg bolsa, isik 2 kg-ǵa jetken. Bul patologıa týǵan kezde qaterli emes, alaıda ómiriniń alǵashqy alty aıynda onkologıalyq aýrýǵa aınalýy múmkin, sondyqtan mundaı isigi bar nárestelerge dereý ota jasalady.
Týǵannan keıingi alǵashqy saǵattarda neonataldyq reanımatologtar men hırýrgtar toby balany ortalyqqa jetkizý úshin perzenthanaǵa bardy. Qyzdy jańa týǵan nárestelerdiń reanımasıa bólimshesine jatqyzyp, aýqymdy otaǵa daıyndaı bastady. Kelesi kúni dárigerler isikti alyp tastaý otasyn jasady.
Ortalyqtyń bólimshe meńgerýshisi Samatbek Myrzahmettiń aıtýynsha: "Bul — segizkóz-quıymshaq aımaǵynyń teratomasy, ıaǵnı ártúrli tektes tinderden, sonyń ishinde súıek, jumsaq tinder men kıstalyq qýystardan turatyn isik. Bul bizdiń tájirıbedegi eń kúrdeli otalardyń biri boldy: salmaǵy 2 kg isik — balanyń salmaǵymen teń derlik. Týǵan kezdegi jalpy salmaq 4 kg bolsa, dál jartysyn isik qurady. Ota sátti ótti. İsikti alǵan soń birden plasıkalyq ota jasadyq. Tigister baıqalmaıdy, aldaǵy ýaqytta sábı eshqandaı qolaısyzdyq sezinbeıdi. Bala aman-esen úıine shyǵarylady".
Teratoma ishte damyp, júktiliktiń 20-aptasynda skrınıng kezinde anyqtalǵan. Erli-zaıyptylar júktilikti saqtap qalý úshin barlyq múmkindikti jasady: olar birneshe konsılıým men BSHMKO hırýrgtarynyń keńesinen ótti. Dárigerler densaýlyqtyń negizgi kórsetkishterin dınamıkalyq baqylap otyrdy. 34-aptada sábı kesar tiligi arqyly dúnıege keldi.
Qyzdyń anasy Aıajan: "Bul — tórt uldan keıingi kópten kútken qyz. Júktiliktiń 20-aptasynda dárigerler segizkóz-quıymshaq teratomasyn anyqtady, biz birden BSHMKO-ǵa keńeske keldik. Jalpy júktilik jaqsy ótti. 34-aptada ishim aýyryp perzenthanaǵa tústim, maǵan birden kesar tiligi jasaldy, sodan keıin balammen osynda aýystyryldyq. Qyzymdy qutqarǵan osy aýrýhana dárigerlerine óte rızamyn. Balamdy týǵannan keıin kórdim, sol úlken isikti kórdim. Balamnyń emine qatysqan barlyǵyna rahmet", — dedi.
Aıta keteıik, segizkóz-quıymshaq teratomasy — jańa týǵan nárestelerdegi eń kóp taralǵan isik. Ol ana qursaǵynda paıda bolyp, balamen birge ósedi, keıbir jaǵdaılarda aýyr asqynýlarǵa jáne ómirlik mańyzdy organdardyń jumysynyń buzylýyna ákelýi múmkin. Bul jaǵdaıda isik úlken mólsherge deıin ósken.
Jyl basynan beri Almatydaǵy Balalar shuǵyl medısınalyq kómek ortalyǵynyń jańa týǵan náresteler bólimshesine 96 bala aýystyryldy, onyń 72-sine hırýrgıalyq aralasý qajet boldy. Týa bitken aqaýlardyń damýyna ártúrli ishki jáne syrtqy faktorlar, sonyń ishinde tuqym qýalaýshylyq, ınfeksıalar jáne basqa da áserler yqpal etýi múmkin.