Almatyda Nazarbaev pen Ál-Farabı dańǵyldarynyń qıylysyna jýyq jerde jańa saıabaq salý úshin 20-dan astam jer ýchaskesi alynady. Qala ákiminiń tıisti qaýlylary «Vechernı Almaty» gazetinde jarıalandy, dep habarlaıdy infohub.kz saıty.
Qujattarǵa sáıkes, ákimdik memleket muqtajy úshin qalanyń Medeý aýdanyndaǵy 21 jer ýchaskesin májbúrlep ıelikten shyǵarýdy bastaýdy uıǵardy. Sóz ortaq paıdalanylatyn nysan — Ál-Farabı dańǵylynan ońtústikke, Nazarbaev dańǵylynan batysqa qaraı ornalasatyn saıabaq týraly bolyp otyr.
Májbúrlep ıelikten shyǵarý kúni belgilendi — 2028 jylǵy 31 jeltoqsan. Menshik ıelerine zańnamada belgilengen tártippen ótemaqy tólenedi, al alynǵan soń jer ýchaskeleri Almatynyń qoǵamdyq keńistikterdi damytý basqarmasynyń balansyna beriledi. Buzý jumystary Kırpıchnozavodskaıa, Panfılov jáne Nazarbaev kóshelerindegi ýchaskelerdiń ıelerine qatysty bolady.
Sonymen qatar qalanyń basqa aýdandarynda da birneshe ýchaske alynady. Máselen, Qulja traktisi, 94 mekenjaıyndaǵy ýchaske sý qubyrynyń sorǵy stansıasyn salý úshin alynady. Kórshiles Qulja traktisi, 94/2 ýchaskesi Rysqulov dańǵylynan Buqtyrma kóshesine deıingi Qulja traktisin rekonstrýksıalaý úshin alynady. Tastaq-2, 5/1 shaǵyn aýdanyndaǵy taǵy bir ýchaske ortaq paıdalanylatyn nysan úshin alynady.
Ielikten shyǵarý jumystarynyń barlyǵy 2027 jylǵy 31 jeltoqsanǵa deıin aıaqtalady dep kútilýde. Budan bólek, Kókshoqy, 1/10 shaǵyn aýdanynda ornalasqan jalpy aýdany 0,9724 ga jerdiń 0,1665 ga bóligine «Kókjaılaý» taý-shańǵy keshenine aparatyn joldy salý úshin qurylys kezeńine, 2029 jyldyń sońyna deıin shekteýli paıdalaný quqyǵy belgilenedi.