Almatyda qaıyn enesin zorlady degen kúdikpen er adam ustaldy. Megapolıstik polısıa departamenti ustaý sátin jarıalady, dep habarlaıdy infohub.kz saıty.
Buǵan deıin áleýmettik jelilerde Almaty turǵyny 1961 jyly týǵan týysyna qatysty zorlyq-zombylyq jasaǵany týraly aqparat taraǵan. Sondaı-aq, polısıa saraptama júrgizý úshin tıisti qaýly usynbaǵany aıtylǵan.
Almaty polısıa departamenti bul málimetterdi joqqa shyǵardy. Vedomstvonyń resmı ókili Saltanat Ázirbek kúdiktiniń ustalyp, ýaqytsha ustaý ızolátoryna qamalǵanyn málimdedi. Qylmys faktisi boıynsha qylmystyq is qozǵalyp, sotqa deıingi tergeý júrgizilýde.
«Áleýmettik jelilerde áıeldi zorlaý faktisi boıynsha qylmystyq isti tergeý mán-jaıyna qatysty shyndyqqa sáıkes kelmeıtin aqparat taralýda. Bul is boıynsha Áýezov aýdanynyń polısıa basqarmasy qylmystyq is qozǵady, kúdikti ustalyp, ýaqytsha ustaý ızolátoryna qamaldy. Sotqa deıingi tergeý júrgizilýde. Tergeýdiń tıisti túrde júrgizilmegeni týraly aqparat shyndyqqa sáıkes kelmeıdi. Kúdiktiniń áreketterine prınsıpti, obektıvti quqyqtyq baǵa beriledi. Kinási anyqtalǵan jaǵdaıda, ol Qazaqstan Respýblıkasynyń zańnamasyna sáıkes jazaǵa tartylady», — dep DP baspasóz qyzmeti Ázirbektiń sózin keltirdi.
Polısıada aqparattyń durys emestigin taratqan avtordy jaýapkershilikke tartý máselesi qaralyp jatqanyn da atap ótti.