InfoHub Logo

Almatyda bir jastaǵy sábıdiń ómirine qater tóndi. Kishkentaı búldirshin ishine 31 magnıt jutyp qoıyp, shuǵyl ota jasaýǵa májbúr boldy. Dárigerler bir magnıttiń ózi qaýipti ekenin eskertedi.

Bul týraly Infohub.kz aqparat agenttigi habarlaıdy.

Sábıdiń jaǵdaıy óte aýyr bolǵan

Almaty qalasynyń Balalar jedel medısınalyq járdem ortalyǵyna 1 jas 9 aılyq sábı óte aýyr halde jetkizilgen. Teskerýden keıin dárigerler sábıdiń isheginde 31 magnıt baryn, sondaı-aq jińishke ishektiń birneshe jerinen tesilip ketkenin jáne ish qýysyna nájis taraǵanyn anyqtady.

Shuǵyl ota jasaldy

Sábıdiń ómirin saqtap qalýdyń jalǵyz joly – dereý hırýrgıalyq aralasý boldy. Medısına mamandary ish qýysyn ashyp, ondaǵy aǵzalardy tekserip, ishekten magnıtterdi aldy. Sonymen qatar, jińishke ishektiń tesilgen jerlerin tigip, ish qýysyn tazartyp, drenaj qoıdy. Sábıdiń ishegine transanaldy ıntýbasıa jasaldy.

Magnıttiń qaýpi

Ortalyqtyń hırýrg-dárigeri Asqar Rızvanovtyń aıtýynsha, magnıtterdiń erekshe qaýpi – olardyń bir-birine ishte tartylyp, ishek qabyrǵasyn qysyp qalýynda. Bul qan aınalymyn buzyp, tinderdiń ólip ketýine, tesikterdiń paıda bolýyna ákelip soǵady. Saldarynan, nebári birneshe saǵat ishinde perıtonıt damıdy.

«Kóbinese ata-analar jaǵdaıdyń qanshalyqty tez nasharlaýy múmkin ekenin túsinbeı jatady», - deıdi dáriger.

Dárigerler bir magnıttiń ózi ishke tússe de, dereý medısınalyq kómekke júginý kerektigin basa aıtady. Birneshe magnıttiń jutylýy – sábıdiń ómirine tikeleı qaýip.