Almatyda jas turǵyn dýsh kabınasyn tazalap júrip, tazartqysh zattyń býynan ýlandy. Oqıǵa úı jınaý kezinde boldy: qyz geldi betine jaǵyp, gýbkamen kirdi ketire bastaǵan. Birneshe mınýttan keıin onyń kózi jana bastap, tynysy tarylyp, basy aınalyp, júrek soǵysy jıiledi, dep habarlaıdy infohub.kz saıty.
Mash Telegram-arnasynyń málimetinshe, 25 jastaǵy zardap shekken qyz esin joǵaltqan, al jedel járdem kelgenge deıin oǵan kórshisi — dáriger kómek kórsetken. Shaqyrtýǵa kelgen medıkter aýrýhanaǵa jatqyzýdy usynǵan, biraq qyz bas tartqan. Alaıda kóp uzamaı onyń jaǵdaıy kúrt nasharlap, ony áıteýir aýrýhanaǵa jetkizgen, onda qajetti prosedýralar, sonyń ishinde tamshylatyp engizý jáne ottegi terapıasy júrgizilgen. Dárigerler hımıalyq zattyń býymen ýlaný dıagnozyn qoıǵan.
Almaty qoǵamdyq densaýlyq saqtaý basqarmasy naýqastyń «hımıalyq zat býymen jeńil dárejede ýlaný» dıagnozymen aýrýhanaǵa jatqyzylǵanyn rastady. Qabyldaý bólimshesinde ony mýltıdısıplınarlyq top qarap, shuǵyl kómek kórsetip, turǵylyqty jeri boıynsha emhanada ambýlatorıalyq baqylaýǵa shyǵarǵan.
Medıkter nashar jeldetiletin bólmede turmystyq hımıany qoldaný tynys joldarynyń titirkenýin, bronhospazmdy, tipti uzaq áser etkende ókpeniń zaqymdalýyn týdyrýy múmkin ekenin eskertedi. Ásirese, quramynda hlory bar zattardy qyshqyldarmen nemese amıakpen aralastyrý qaýipti, bul ýly gazdardyń bólinýine ákeledi.
№4 qalalyq aýrýhananyń qabyldaý bólimshesiniń meńgerýshisi Magadın Haıroev alǵashqy belgiler paıda bolǵanda dereý tazalaýdy toqtatyp, taza aýaǵa shyǵýdy usynady. Jaǵdaı jaqsarsa da, bólme tolyq jeldetilgenshe oǵan qaıta oralmaý kerek. Jeldetýdi kúsheıtý úshin terezeler men esikterdi ashý qajet.
Dáriger alańdatarlyq belgilerge nazar aýdarady: kúsheıgen jótel, tamaqtyń qyjyldaýy jáne janýy, kózdiń titirkenýi, ysqyryqty tynys, entigý, bas aınalý jáne júrek aıný. Zat terige nemese kózge túsken jaǵdaıda ony tez arada ketirý kerek: sýmen jýý, kıimdi sheshý, kózdi keminde 15 mınýt shaıý.
Medıkter ártúrli tazartqysh zattardy, ásirese quramynda hlory bar zattardy qyshqyldarmen nemese amıakpen aralastyrýǵa bolmaıtynyn atap ótedi — bul ýly qosylystardyń túzilýine jáne tynys joldarynyń aýyr zaqymdalýyna ákelýi múmkin. Eger taza aýaǵa shyqqannan keıin belgiler saqtalsa nemese kúsheıse, medısınalyq kómek qajet. Aýyr belgiler — aıqyn entigý, tunshyǵý, keýdedegi aýyrsyný, es-tústiń buzylýy — kezinde dereý jedel járdem shaqyryp, zardap shekkenge tynyshtyq pen taza aýa aǵynyn qamtamasyz etý kerek.