Almatylyq turǵyn páter, turǵyn emes úı-jaı jáne turaq ornyn tolyq tólep, nysannyń tapsyrylý merzimi buzylǵany úshin sot arqyly merdigerden 10 mln teńgeden astam qarajat óndirip aldy. Bul týraly infohub.kz saıty habarlaıdy.
Joǵarǵy sottyń Telegram-arnasynda málim etkendeı, 2021 jyly almatylyq merdigermen páter, turǵyn emes úı-jaı jáne turaq ornyn satyp alýǵa aldyn ala sharttar jasasqan. Ol nysandardyń qunyn tolyq tólegen.
«Merdiger qurylys jumystaryn aıaqtap, negizgi satyp alý-satý sharttaryn 2023 jyldyń sońyna deıin jasasýǵa mindettengen. Alaıda is júzinde nysan tek 2024 jyldyń qazanynda paıdalanýǵa berildi. Qabyldaý-tapsyrý aktileri 2025 jyldyń qańtarynda qol qoıylyp, negizgi satyp alý-satý sharttary 2025 jyldyń naýryzynda jasaldy», — dedi sotta.
Osyǵan baılanysty satyp alýshy sotqa júginip, merdigerdiń nysandy paıdalanýǵa berý jáne negizgi sharttardy jasasý merzimderin buzǵanyn kórsetip, mindettemelerdi oryndaý merzimi buzylǵany úshin ósimpul óndirýdi talap etti.
Aıta keteıik, birinshi jáne apelásıalyq satylardaǵy sottar Azamattyq kodekstiń 353-baby bul daýǵa qoldanylmaıdy dep, talap qoıýdy qanaǵattandyrýdan bas tartqan. Sebebi bastapqy mindetteme aqshalaı bolmaǵan, al negizgi sharttar jasalǵannan keıin aldyn ala sharttar boıynsha mindettemeler toqtatylady.
«Azamattyq ister jónindegi kasasıalyq sot bul tásilmen kelispedi. Sot negizgi sharttyń jasalýy onyń jasalýyna deıin jiberilgen sharttardy buzǵany úshin jaýapkershilikten bosatpaıtynyn atap ótti. Satyp alýshy tólem boıynsha óz mindettemelerin tolyq jáne ýaqtyly oryndaǵan, al merdiger nysandardy paıdalanýǵa berý jáne negizgi sharttardy jasasý merzimderin buzǵan», — dep qosty Joǵarǵy sotta.
Sharttarda merdigerdiń jaýapkershiligi qarastyrylǵany naqtylandy: merzimi keshiktirilgen árbir kún úshin satýshy jyljymaıtyn múlik qunynyń 0,1%-y mólsherinde ósimpul esepteıdi, biraq 10%-dan aspaıdy.
Kasasıalyq sot ósimpul mindettemeni tıisinshe oryndamaǵany úshin, sonyń ishinde merzimderdi buzǵany úshin jaýapkershilik nysany ekenin túsindirdi. Bastapqy mindettemeniń aqshalaı sıpatta bolmaýy satyp alýshyny ósimpul alý quqyǵynan aıyrmaıdy.
Nátıjesinde birinshi jáne apelásıalyq satylardaǵy sot aktileri joıylyp, 10,5 mln teńge ósimpul óndirý týraly jańa sheshim shyǵaryldy.