InfoHub Logo

Qý qulqyndy qurǵatpaıtyn — ózimiz. Sondyqtan: Tańerteń iriń basqan kózińdi tyrnalap ashpastan buryn, ishinde esektiń mıyndaı mıy joq zilbatpan basyńdy qusyqtyń ısi sińgen jastyqtan kótermeı turyp, pahmeldi qaıdan tabatynyńdy josparlap al.

Ólgen qoıdykindeı alaıǵan kózińdi sekseýildeı tarbıǵan saýsaqtaryńmen ýqalap, tilim-tilimi shyǵyp, kezergen ernińdi tilińmen jibitken soń, «júrgenge júz gram iligedi» degen qaǵıdany qaýashaǵyńda ustap, bazar-vokzaldy adaqta.

Rápet-kelbeti, bet-júzi, morda-oblısovkalary tanys adamdardyń barlyǵynan amandyqtan buryn, júz teńge bolmasa da, júz gramǵa jetetindeı qaıyr (nalog deseń de bolady) sura.

Araq-sharap iship otyrǵan kez kelgen topqa baryp: «baýyrym, qazaqpyz ǵoı» dep ultjandylyǵyńdy bildirip, kókiregińdi ur.

Maskúnemniń — uly, araqtyń — quly, spırttiń — úmbeti ekenińdi, áste umytpa.

Shaqyrǵan jerden de, shaqyrmaǵan jerden de (sońǵysy senimdileý) qalma. Sonan soń, taıaý arada toı-tomalaq jasaıtyn otbasylardyń tizimin túzip, taýyqtyń mıyndaı (eger ol bolsa) mıyńa kodtap, der kezinde reıd jasap, súzip shyq.

Araq joq jerden alty qadam ary júr.

Aıyń ońynan týyp, jaryp qalǵan kúnderi bótel­keles baýyrlaryńdy esirkep, músirkep qoı. Túbi qaıta­ry­my bolady.

Qyzyl shápkilini kórgende on jerden mas bolsań da qashpa. Alqashtyq abyroıyń túsedi. Olar qaltasynda kók tıyny joq seni kerek te etpeıdi. Qaıta olar senen qashsyn!

Araqqa «toıyp» alǵan kúnderi óship qalmaı turyp, qoǵamdy túletý, reformalardy júrgizý, Úkimetti basqarý jaıly «tyń ıdeıa», «qundy pikir», «leksıalaryńdy» kóldeneń ótken kók attynyń bárine aıtyp, jarnama jasa. Olar seniń «danyshpan» ekenińdi moıyndasyn.

Jalǵasyn basyń jazylǵan kúni taýyp alyp oqyr­syń.

---