InfoHub Logo

Urys-keriske ıkemi bar, daý-janjalǵa jany qumar, tóbeles kezinde eki bilegin sybanyp, ósek aıtatyn ernin shúıirip, tiken tilin bezep, eki kózi shatynap shyǵa keletin «daryndy» da shalymdy, bolashaǵynan mol úmit kúttiretin kelinderdi «Enelerge qarsy kúres» kýrsyna oqýǵa shaqyramyz. Kelinderdiń dinine, tiline, otaý qurǵan jylyna, jolyna, jasyna shek qoıylmaıdy.

Kýrsqa talapkerler tegin qabyldanady. Olar stıpendıamen, jataqhanamen jáne enelerdi uryp-soǵý, sabaý, sondaı-aq qarsylastarmen qaqtyǵysta bronejelet sekildi qorǵaný quraldarymen qamtamasyz etiledi. Sonymen qatar  enemen birge turǵan jyldaryna «za vrednost tólenedi.

Sabaq kezinde Olar «Shymshý», «Bet julý», «Tyrnaý», «Qaıyn jurt tarıhy», «Ene tebý», «Taekvon-do», «Qaınyata-do», «Ósek aıtý negizderi», «Kúıeýmen erkin kúres» taqylettes dárister men sport túrlerin meńgeredi.

Qyzyǵy men qıyndyǵy qatar turatyn bul mamandyqty oıdaǵydaı meńgerip, óziniń túgili, ózgeniń de enesin julyp-jeýge qabiletti bolǵan soń, olar shetelge, ıaǵnı Amerıkaǵa, Batys Eýropaǵa, Reseıge tájirıbe almasýǵa jiberiledi.

Kýrsty Shataq ǵylymdarynyń doktory, profesor, «Enelerdi qan kaqsatý» ǵylym akademıasynyń Qurmetti akademıgi, Jeztyrnaq syılyǵynyń laýreaty Dolykúl Betpaqova júrgizedi.

Bizdiń zamanymyzǵa saı qurylǵan oqý ordamyzdyń demeýshileri «Abysyndar alqasy», «Jas kelinder» AQ, «Ene kene» fırmasy, «Mystan» JSHS, «Bizbıke bıkeshter» keńesi.

Otbasyna egemen alyp, derbes ómir súrgińiz kelse, bizge kelińiz. Biz sizderge qashan da qol ushyn, bilek kúshin bere alamyz.

«Jalmaýyz kempir» atyndaǵy Mazaq akademıasy.

---