Abaı oblysynda toǵyz jasar bala ata-anasyn aldap, úı aýlasyndaǵy qosalqy qurylysta jasyrynyp qaldy. Keıin bala bul áreketin prank dep atady, dep habarlaıdy infohub.kz.
Oblystyq polısıa departamentiniń málimetinshe, oqıǵa Maqanshy aýdanynda bolǵan. Tórtinshi synyp oqýshysy saǵat 13:00 shamasynda mektepke ketken, biraq sabaqtan keıin úıge oralmaǵan. Anasy balany ózi izdep, saǵat 20:30 shamasynda úıdiń janynan bir jazba taýyp alǵan: «Ana, áke, meni izdemeńder, men bir kúni oralamyn».
Týystary dereý polısıaǵa habarlasqan. Kelgen qyzmetkerler toptarǵa bólinip, aýlalar men mańaıdaǵy aýmaqty teksere bastaǵan. 10 mınýttan keıin bala óz úıiniń aýlasyndaǵy qosalqy qurylystan shyqqan. Mektepten keıin úıge kelip, sol jerge jasyrynyp, uıyqtap ketkeni anyqtalǵan. Bala polısıa kólikteriniń sırenasynan oıanypty.
Tońyp, qorqyp ketken oqýshy dereý anasyna júgirgen. Ol ata-anasyna prank jasaǵysy kelgenin aıtqan. Abaı oblysy polısıa departamenti ata-analardy balalarǵa qaýipsizdik erejelerin únemi eske salyp, mundaı «ázilderdiń» aýyr saldary bolýy múmkin ekenin túsindirýge shaqyrady.