InfoHub Logo

Aqnaıman Oısynbaı sheshendi zamandaǵy Qambar degen tóre sheshendigi úshin syılap, qaıran qylyp súırep júredi eken. Oısynbaıdyń birge týysqandary hám balasy tóreniń syılaǵanyn arqa tutyp, urlyq qylady. Qýyp kelse, tendik bermeı zorlyq qylady. Oısynbaı: «qoı» dep olarǵa aqylyn aldyra almapty. Baýyrlarynyń qylǵan isi asqynyp ketken soń Qambar Oısynbaıdy bir shaqyryp, eki shaqyrtsa kelmeıdi. Barmasa zorlap aparatynyn bilip, úshinshi shaqyrtqanda barady.

Barǵan soń tóre ashýlanyp aqyrypty:

— Áı, sen shańyraq kóz! Aýzyńnan kelgen dámim ketpeıdi. Arqańnan qamshymen salǵan tabym ketpeıdi. Boı teńeldik qylaıyn dediń be? Eki shaqyrtqanymda nege kelmediń? Kóbeńsıin degen ekensiń tura tur! — dep tóre qalsh-qalsh etedi.

Sonda Oısynbaı:

— Men kelmeımin dedim be, taqsyr! Esik aldy ura boldy, úıdiń arty jyra boldy; baı bereke qondy, kedeı shetke qondy; etek-jeńim boq boldy, kısem, kıer tonym joq boldy; boq qalpymmen qalaı sizge kórine alamyn dep uıalyp kelmep edim, - dep jaýap beripti.

Tóre sonda oılanyp otyryp-otyryp: «Ras aıtady-aý qurǵyr!». Ashýyn tarqatyp, taǵy da qaıran qylyp júrgen eken desedi.

Osy Qambar tóreniń eline Ýaqtan shyqqan Qaraqat Jarqyn degen sheshen bir qun daýlaı kelgen eken. Kisisiniń quny anyq bolǵan soń, úsh kún jatyp sóılesip, ózi tildi kisi sóz bergen soń, tóre buǵan sóılesýge Oısynbaıdy shaqyrypty. Oısynbaı kelip jurt jıylyp otyrǵan soń:

— Al, sóıleńder, — degende, Oısynbaı:

— Jarqyn sóılese, orystan jegen nanyn aıtady, Oısynbaı sóılese, Qambardan jegen qanyn aıtady. Munyń bıligin han Qambar aıtsyn depti (Jarqyn teginde orysqa tyńshy (shpıon) bolyp, aqy alyp, qazaqty kóp jegen kisi eken). Oısynbaı sonysyn aıtqan soń, amalsyz Qambardyń bıligine razy bolady, bılikti maǵan aıtqyz deı almaıdy.

1918

---