InfoHub Logo

Atyraýdaǵy sot prosesinde marqum Naýryz Muqanǵalıevtiń kórshisi Sherhan Eńsegenulymen jazysqan hattary jurtshylyq nazaryna usynyldy. Tergeý organdarynyń boljamyna sáıkes, bul hattardy Naýryzdyń atynan ony óltirdi degen kúdikke ilingen Sultan Sársemalıev jazǵan.

Bul týraly Infohub.kz aqparat agenttigi habarlaıdy.

Sotta anyqtalǵandaı, Sherhan Eńsegenuly men Naýryz Muqanǵalıev jaqyn dos bolǵan. Olar únemi bir-birine daýystyq habarlamalar arqyly habarlasyp turǵan. Alaıda, 2025 jyldyń 5 qarashasynan bastap Sherhanǵa Naýryzdyń atynan mátindik habarlamalar kele bastaǵan. Tergeý nusqasy boıynsha, bul habarlamalardyń barlyǵyn Naýryz qaıtys bolǵannan keıin Sultan Sársemalıev jazǵan.

Malǵa qaraý týraly alǵashqy ótinish

Sársemalıevtiń alǵashqy habarlamalary malǵa qatysty bolǵan. Ol keshke maldy aýlaǵa kirgizip qoıýdy ótinip, úıde eshkim joq ekenin aıtqan. Kórshisi bul ótinishti oryndap, ýaqytyn naqtylaǵan soń, keshke habarlamanyń oryndalǵany týraly oń jaýap alǵan.

Qaryz jáne úılený toıy

Kelesi kúni «Naýryz» atynan taǵy bir ótinish túsken. Bul joly tańerteń qoı men sıyrdy óriske jiberýdi surap, aqysyna aqsha aýdaratynyn aıtqan. Alaıda, kórshisi aqshadan bas tartyp, jaǵdaıdyń anyq-qanyǵyn suraǵan. Oǵan Naýryzdyń ata-anasynyń qalada em qabyldap jatqany jáne qashan keletini belgisiz ekeni týraly jaýap berilgen. Malǵa sý berý qajettiligi týraly suraqqa, ata-anasy kelgen soń ózderi qaraıtyny aıtylyp, sýdyń qajeti joq ekeni habarlanǵan.

Keıinnen hat almasý jalǵasyp, habarlama jazǵan adam ata-anasynyń áli oralmaǵanyn aıtyp, kórshisinen sharýashylyqqa qarap turýdy suraǵan. Sonymen qatar, jıi ótinish aıtyp jatqany úshin renjimeýin ótingen. Ol ákesiniń buryn mal qaraýdy basqa adamǵa tapsyrǵanyn, biraq sol adamnyń ishimdikke salynyp ketkenin aıtyp, kórshisinen kómek suraýǵa májbúr bolǵanyn jetkizgen.

Kúdikti malshy

Sherhan Eńsegenuly birneshe kún boıy malǵa qarap júrgen. Keıinnen Darhan Baqytov esimdi malshy tabylǵan. Sot barysynda anyqtalǵandaı, Sársemalıev Naýryzdyń atynan eki jyldan keıin dál osy adammen baılanysqa shyqqan.

Kórshiniń kúdigi

Bul jaǵdaıda bir syr baryn alǵash bolyp kórshi Sherhan sezgen. Mal satyla bastaǵanda ol kúdiktene bastap, «Bir nársege urynyp qaldyń ba?», «Máken qaıda?», «Sende bir másele bar sıaqty», «Aıtsań, kómektesemin ǵoı, biz kórshi emespiz be?» dep naqtylap suraǵan.

Buǵan jaýap retinde Sársemalıev Naýryzdyń atynan adamdardyń mazaq etkenin qalamaıtynyn, qarjylyq qıyndyqtarǵa baılanysty máseleleri bar ekenin jazǵan. Sondaı-aq, qazirgi ýaqytta sharýashylyqpen ózi aınalysa almaı júrgenin, qaryzy kóbeıip ketkenin, anasynyń ýaıymdap, qan qysymy kóterilip tósek tartyp qalǵanyn aıtqan. Budan bólek, úılengeli júrgenin, sondyqtan ákesiniń mal satýǵa ruqsat bergenin habarlaǵan.