Aqtóbe oblysynda aýyl sharýashylyǵy óndiristik kooperatıvteriniń basshysy búdjetten 91 mln teńgeden astam sýbsıdıany alaıaqtyq jolmen alyp, kináli dep tanyldy, dep habarlaıdy infohub.kz saıty.
NUR.KZ Bas prokýratýraǵa silteme jasap habarlaýynsha, sýbsıdıalardy zańsyz alý faktilerin Martók aýdanynyń prokýratýrasy búdjet qarajatynyń maqsatty jáne tıimdi jumsalýyn tekserý barysynda anyqtaǵan. Sóz erekshe iri mólsherdegi alaıaqtyq týraly bolyp otyr.
Qadaǵalaý organynyń resmı Telegram-arnasynda bylaı delingen: «"Tomırıs-2019", "Martók-2030" jáne "Teńge-2030" aýyl sharýashylyǵy óndiristik kooperatıvteriniń basshysy 2023–2025 jyldar aralyǵynda baıý maqsatynda kórineý jalǵan málimetter engizý arqyly sýbsıdıalardy alaıaqtyq jolmen zańsyz alyp, memleketke 91 mln teńgeden astam shyǵyn keltirgeni anyqtaldy».
Osy fakti boıynsha aýdan prokýratýrasy Qazaqstan Respýblıkasy Qylmystyq kodeksiniń 190-baby 4-bóliginiń 2-tarmaǵy boıynsha qylmystyq is tirkedi. Áıel sotqa berildi.
Martók aýdandyq sotynyń úkimimen ol kináli dep tanyldy. Oǵan 6 jyl 8 aıǵa bas bostandyǵynan aıyrý jazasy taǵaıyndalyp, komersıalyq uıymdarda basshylyq laýazymdardy atqarý quqyǵynan aıyryldy. Sottalǵan áıeldiń kámeletke tolmaǵan balalary bolýyna baılanysty jazany óteý keıinge shegerildi.