Aqtóbe oblysynda óz kúıeý balasyn óltirýge oqtalǵan burynǵy polıseıge úkim shyqty. Ol 10 jylǵa bas bostandyǵynan aıyryldy, dep habarlaıdy «Dıapazon», onyń aqparatyn infohub.kz saıty usyndy.
Qylmystyq is materıaldaryna sáıkes, qaıǵyly oqıǵa Hromtaýdaǵy demalys bazasynda bolǵan. 32 jastaǵy ýchaskelik ınspektordyń kómekshisi toı-tomalaqtan keıin qyzmetke kirisýi kerek bolǵandyqtan, qasynda Makarov tapanshasy bolǵan.
Toı-tomalaqqa polıseıdiń ápkesiniń jubaıy da qatysqan. İshimdik ishý barysynda ol áıelin uryp-soqqanyn jáne budan bylaı da jalǵastyratynyn moıyndaǵan. Osyndaı sózderdi estigen ýchaskelik ınspektordyń kómekshisi qyzmettik qarýyn alyp, kúıeý balasyna tikeleı atqylaı bastaǵan.
Tórtinshi oqta gılza tapanshaǵa keptelip qalǵan. Zardap shekken er adam keýdesi men ishinen jaraqat alyp, reanımasıa bólimine jatqyzylǵan.
Jaraly er adam aman qaldy, al burynǵy polıseı óltirýge oqtalý aıybymen sot oryndyǵyna otyrdy. Sottalýshynyń ózi janjal kúıeý balasynyń jumystan suranyp, kompanıamen birge demal degen talabynan týyndaǵanyn aıtqan.
Sot osy rezonansty is boıynsha úkim shyǵardy. Óltirýge oqtalý úshin eks-polıseı 10 jylǵa bas bostandyǵynan aıyryldy.
Eske salaıyq, osy jyldyń naýryz aıynyń sońynda Aqtóbe oblysynda atys bolǵany týraly aqparat taraǵan, oqty polıseı qyzmetkeri atqan dep boljanǵan. 36 jastaǵy zardap shegýshi Hromtaý aýdandyq aýrýhanasynyń reanımasıasyna jetkizilgen. Polısıa qylmystyq is qozǵaǵan.
Keıin oqıǵa Hromtaýdaǵy demalys bazasynda bolǵany belgili boldy. Aldyn ala derekter boıynsha, janjal kezinde polıseı qarsylasyna qyzmettik tapanshasynan tórt ret oq atqan. Sondaı-aq janjalǵa qatysýshylar týys ekeni habarlanǵan. Jábirlenýshi qaıyn aǵasyn keshirgen.