Túrkistan oblysynyń soty Bıbınýr Izbasarovaǵa qatysty úkim shyǵardy. Ol 6 maýsymda Arys qalasynda bolǵan apatta kináli dep tanyldy. Mas kúıinde kólik júrgizgen áıel jeke úıdiń qasyndaǵy oryndyqta otyrǵan adamdarǵa joǵary jyldamdyqpen soǵylǵan, dep habarlaıdy infohub.kz.
Soqqy saldarynan júktiligi kesh merzimdegi 30 jastaǵy balabaqsha tárbıeshisi, onyń eki jasar uly jáne kórshiniń bes jasar qyzy qaza tapty. Taǵy birneshe adam ártúrli dárejede jaraqat aldy. Tergeý derekteri boıynsha, soqtyǵysýdan sál buryn kólik qorshaýdy qulatyp ótken.
Qylmystyq ister jónindegi mamandandyrylǵan aýdanaralyq sottyń sýdıasy Marat Kýzdeýbaev úkimdi jarıalady: «Aıyptalýshy Bıbınýr Izbasarova Qazaqstan Respýblıkasy Qylmystyq kodeksiniń 345-babynyń 4-bóliginde kózdelgen qylmystyq quqyq buzýshylyqty jasaǵany úshin kináli dep tanyldy. Oǵan kólik quralyn basqarý quqyǵynan ómir boıyna aıyra otyryp, 9 jylǵa bas bostandyǵynan aıyrý jazasy taǵaıyndaldy».
Aıyptalýshy kinásin moıyndap, sot zalynda ókindi. Ol múgedek qyzyn tárbıelep otyrǵanyn alǵa tartyp, jazany jeńildetýdi surady. Sot bul mán-jaıdy eskerip, naqty jazany bir jylǵa keıinge qaldyrdy. Alaıda qaza tapqandardyń otbasylary úkimdi tym jeńil dep sanap, neǵurlym qatań jazaǵa qol jetkizýdi kózdep otyr.
«Úsh adamnyń ómiri úshin — toǵyz jyl. Bul qalypty ma? Ol tiri, saý, erkin júredi. Al onyń 12 jasar balasy bolǵanymen ne isteımiz? Bizde anasyz qalǵan tórt jasar bala bar. Ol jylaǵan saıyn júregim eziledi. Ádilettilik qaıda? Biz buǵan kelispeımiz», — dedi zardap shekken Aǵaısha Manatova.
Sot sondaı-aq zardap shekkenderdiń moraldyq jáne materıaldyq zıandy óteý týraly azamattyq talaptaryn ishinara qanaǵattandyrdy. Úkim áli zańdy kúshine engen joq jáne oǵan shaǵym jasalýy múmkin.
Eske salaıyq, apat maýsym aıynda Túrkistan oblysynyń Arys qalasynda bolǵan. Jeke úıdiń qasyndaǵy oryndyqta áıelder men balalar otyrǵan kezde olarǵa joǵary jyldamdyqpen kólik soǵylǵan. Adamdardy kirpish qabyrǵaǵa qysyp, qabyrǵa qulaǵan. 29 jastaǵy júkti áıel, onyń 2 jasar uly jáne kórshilerdiń 5 jasar qyzy qaza tapqan. Keıin anyqtalǵandaı, kólikti jergilikti mekteptiń 52 jastaǵy muǵalimi júrgizgen, ol saraptama boıynsha mas kúıinde bolǵan.