Astananyń alty turǵyny júrgizýshi kýáligin alýǵa kómektesemin dep ýáde bergen alaıaqtyń qurbany boldy. Olar oǵan barlyǵy 2,3 mıllıon teńge bergen, alaıda er adam óz mindettemelerin oryndamaǵan, dep habarlaıdy infohub.kz.
Prokýratýranyń málimetinshe, alaıaq azamattardy tanystary arqyly máseleni sheshe alatynyna sendirgen. Aqshany alǵan soń, ol eshqandaı qyzmet kórsetpeı, ony jeke qajettilikterine jumsaǵan.
Sot otyrysy barysynda prokýror aıyptalýshynyń kinásin tolyq dáleldedi. Sot onyń shyn júrekten moıyndaýyn jáne zalaldyń bir bóligin ótegenin eskerip, oǵan 3 jyl 6 aı merzimge bas bostandyǵyn shekteý jazasyn taǵaıyndady. Sonymen qatar, sottalǵanǵa probasıalyq baqylaý belgilenip, ol jaza merzimi ishinde jyl saıyn 100 saǵat májbúrli eńbekke tartylatyn bolady.
Sondaı-aq, er adamǵa birqatar mindetter júkteldi: probasıa qyzmetin habardar etpeı turǵylyqty jerin jáne jumysyn aýystyrýǵa tyıym salý, аlkogóldi tutynýmen baılanysty oıyn-saýyq oryndaryna barýǵa tyıym salý, jumysy bolmaǵan jaǵdaıda jumyssyz retinde tirkelý mindeti, sondaı-aq túngi ýaqytta (saǵat 22:00-den 06:00-ge deıin) úıden tys jerde bolýǵa shekteý qoıý.
Úkim zańdy kúshine engen. Astana prokýratýrasy azamattardy saq bolýǵa jáne zańnan tys jolmen máselelerdi sheshýge ýáde beretin adamdarǵa aqsha bermeýge, tek memlekettik qyzmetterdi alýdyń resmı tásilderin paıdalanýǵa shaqyrady.