Astana turǵyny áleýmettik jelide avtobýs júrgizýshisi balany arbamen esikke qysyp qalǵanyn habarlady. Áıeldiń aıtýynsha, arba jerge qulaǵan, dep habarlaıdy infohub.kz.
dina_ospanova28 esimimen tirkelgen qoldanýshy Threads áleýmettik jelisinde Astanadaǵy №54 avtobýstyń júrgizýshisine qatysty oqıǵany baıandady. "Búgin, 2026 jylǵy 2 qyrkúıekte, shamamen saǵat 08:00-de men balammen avtobýsqa otyrmaq boldym. Arbany kóterip kirgizbek kezde, jolaýshylar kómektesti. Sol sátte júrgizýshi esikti jaba bastady, biraq áli otyrý aıaqtalmaǵan edi", - dedi áıel.
Onyń aıtýynsha, ol jáne basqa jolaýshylar aıǵaılap, júrgizýshini toqtatýdy ótingen, alaıda esik jabyla bergen. "Nátıjesinde arbanyń aldyńǵy dóńgelegi avtobýs esigine qysylyp qaldy. Oǵan qaramastan, júrgizýshi júre berdi. Avtobýs qozǵalǵanda dóńgelek esikten shyǵyp ketip, arba ishindegi balamen birge aýdarylyp, jerge qulady. Sodan keıin avtobýs toqtamaı, ári qaraı júrip ketti. Baqytymyzǵa oraı, bala dene jaraqatyn alǵan joq, biraq qatty qoryqty", - dep jazdy avtor.
Astanalyq áıel "City Transportation Systems" JSHS basshylyǵynan jaǵdaıdy tekserip, kinálini jaýapqa tartýdy surady. Bul jarıalanymǵa "CTS" ókili Oksana Áýbákirova jaýap berdi. "Mundaı jaǵdaı bolǵanyna ókinemiz. Balanyń zardap shekpegenine úmittenemiz. Tekserip jatyrmyz", - dep jazdy ol.