Astanada tórt jasar qyzdyń anasy qyzyn jeke balabaqsha tárbıeshisi uryp-soqqanyn málimdedi. Polısıa qylmystyq is qozǵady, dep habarlaıdy infohub.kz.
Erkenaz Qoshqynbaıdyń aıtýynsha, qyzy balabaqshadan oralǵan soń beti isip, kógergen jerleri bar edi. Dárigerler balanyń jaraqattaryn rastady.
Áıeldiń aıtýynsha, qyz merziminen buryn, salmaǵy shamamen 500 gram bolyp týylǵan. Tórt jyl ishinde ol júregi men kózine birneshe aýyr operasıa jasatqan. Jeke balabaqshaǵa bala úlken ápkesimen birge barǵan.
«Tárbıeshi muny jasyryp, onyń minezi osyndaı, ashýshań, tek urysqanyn aıtty. Al shyn máninde ol balany uryp-soqqan», — dedi qyzdyń anasy.
Bolǵan oqıǵa týraly ata-anaǵa zardap shekken qyzdyń bes jasar ápkesi aıtqan. Anasynyń sózinshe, oqıǵadan keıin eki qyz da nashar uıyqtaıdy jáne balabaqshaǵa qaıtýdan bas tartady. Áıel balalaryna ózi qaraý úshin jumystan ketýge májbúr boldy.
Telearna tilshileri mekemeniń jeke kotej ǵımaratynda ornalasqanyn habarlady. Shamamen 30 bala bar eki top biriktirilip, olarǵa bir tárbıeshi qaraıdy. Otbasy kúsh qoldandy dep aıyptaǵan qyzmetker kameraǵa túsýden bas tartty.
Týystarynyń aıtýynsha, medısınalyq tekserý kezinde baladan basqa da jaraqattar tabylǵan. Sonymen qatar, oqıǵadan keıin qyzda eriksiz zár shyǵarý problemasy paıda bolǵan. Otbasy psıhologqa júginip, tárbıeshini qylmystyq jaýapkershilikke tartýdy kózdep otyr.
Astana polısıa departamenti tergeý bastalǵanyn rastady.
«Kámeletke tolmaǵandy tárbıeleý jónindegi mindetterdi oryndamaý, onyń ishinde oǵan qatygezdikpen qaraý faktisi boıynsha qylmystyq is qozǵaldy», — dedi Astana qalalyq PD baspasóz qyzmetiniń aǵa ınspektory Arýjan Bektasova.
Qazir tergeýshiler oqıǵanyń barlyq mán-jaıyn anyqtap jatyr. Prosestik sheshim tergeý qorytyndysy boıynsha qabyldanady.
Ata-analar memlekettik balabaqshalarda oryn tapshylyǵyna shaǵymdanyp, jeke mekemelerge júginýge májbúr ekenin aıtady. «Jetinshi arnanyń» dereginshe, astanada olardyń qyzmeti aıyna 100 myń teńgeden bastalady.
Kelesi jyldan bastap Qazaqstandaǵy barlyq mektepke deıingi uıymdar mindetti lısenzıalaýǵa kóshýi tıis. Ǵımarattarǵa, pedagogıkalyq quramǵa, bilim berý baǵdarlamalaryna, ınfraqurylymǵa jáne balabaqshalardyń materıaldyq-tehnıkalyq jabdyqtalýyna qoıylatyn talaptardy qataıtý josparlanýda.