10 qyrkúıekten 11 qyrkúıekke qaraǵan túni Astanada donorlyq proses barysynda júrek, ókpe jáne baýyr alyndy. Dárigerler donorǵa qurmet kórsetip, «qurmet dálizin» jasady, dep habarlaıdy infohub.kz saıty.
Qazaqstan Densaýlyq saqtaý mınıstrligi resmı Telegram-arnasynda úsh aǵzasy alynǵan donorǵa qurmet retinde medısına mamandary «qurmet dálizin» jasaǵan beıneni jarıalady. Alynǵan júrek, ókpe jáne baýyr kútý paraǵynda turǵan pasıentterge transplantasıalaýǵa arnalǵany naqtylandy.
«Mundaı árbir jaǵdaıdyń artynda dárigerlerdiń, reanımatologtardyń, transplantologtardyń, donorlyq koordınatorlardyń, sanıtarlyq avıasıanyń jáne basqa da kóptegen mamandardyń orasan zor eńbegi jatyr. Biraq eń bastysy — otbasynyń eń aýyr sátte qabyldaǵan sheshimi. Densaýlyq saqtaý mınıstrligi donordyń týystaryna batyldyǵy men adamgershiligi úshin shyn júrekten alǵys bildiredi», — delingen vedomstvo habarlamasynda.
Aǵymdaǵy jyldyń basynan beri Qazaqstanda 132 yqtımal qaıtys bolǵannan keıingi donor anyqtalyp, 205 transplantasıa jasalǵany atap ótildi.
«2025 jyly betburys boldy. Bir jylda 18 donorlyq proses ótti — bul ótken jylmen salystyrǵanda úsh ese kóp, al transplantasıa sany úsh esege jýyq ósip, 68-ge jetti. Salystyrý úshin: 2023 jyly 19 aǵza transplantasıalanǵan, 2024 jyly — 23. 2026 jyl 2025 jyldyń nátıjesi bir rettik órleý bolmaǵanyn rastap otyr. 11 qyrkúıektegi jaǵdaı boıynsha 13 mýltıaǵzalyq donorlyq proses ótkizilip, qaıtys bolǵannan keıingi donorlardan 42 transplantasıa jasaldy: 14 búırek, 9 baýyr, 11 júrek, 4 ókpe jáne 4 qasań qabyq», — delingen Densaýlyq saqtaý mınıstrliginiń habarlamasynda.