Astana polıseıleri esirtkiniń ınternet-dúkeniniń qoımasy bolýy múmkin jerdi anyqtady: 33 jastaǵy kúdiktiniń páterinen tyıym salynǵan zattar salynǵan 2 myńnan astam oram tárkilendi, dep habarlaıdy infohub.kz saıty.
Er adam esirtkini saqtaý jáne taratý kúdigimen ustaldy. Jeke tintý kezinde onyń beldik sómkesinen ózine tán ıisi bar sur-jasyl ósimdik tektes zat salynǵan oramdar tabyldy. Saraptama onyń marıhýana ekenin anyqtady.
«Kúdiktiniń páterin tintý barysynda túrli tústi ızolentamen oralǵan, uqsas zaty bar 2 myńnan astam oram tabyldy. Sonymen qatar, saraptama qorytyndysy boıynsha gashısh maıy bolyp tabylatyn suıyqtyq quıylǵan ydystar tárkilendi. Tárkilengen esirtkiniń jalpy salmaǵy eki keliden asty», — dep habarlady Astana qalasynyń polısıa departamenti.
Polısıa málimetinshe, ustalǵan adam messendjerler arqyly tyıym salynǵan zattardy taratqan ınternet-dúkenniń «qoıma» qyzmetin atqarǵan. Medısınalyq kýálandyrý kezinde er adamnyń esirtki qoldanǵany da anyqtaldy.
Osy fakti boıynsha qylmystyq is qozǵaldy. Qazir polıseıler esirtkiniń zańsyz aınalymyna qatysy bolýy múmkin basqa adamdardy anyqtap jatyr.
Astana qalasynyń polısıa departamenti tyıym salynǵan zattardy saqtaý, ótkizý jáne taratý qylmystyq jaýapkershilikke ákep soǵatynyn eske saldy.