Astanadaǵy 23 jastaǵy jedel járdem feldsheri Ýldana Myrzýannyń qazasyna baılanysty sot prosesinde taǵy bir prosestik oqıǵa oryn aldy. Astana qalasynyń qylmystyq ister jónindegi aýdanaralyq sotynyń tóraıymy Merýert Abaeva sottalýshynyń advokaty Dáýren Eslámbekulyna qatysty jeke qaýly shyǵardy. Buǵan sebep — qorǵaýshynyń túski úzilisten keıin otyrysqa kelmeýi, dep habarlaıdy infohub.kz.
Sot aktisine sáıkes, 2026 jylǵy 20 tamyzdaǵy otyrysta qaıtys bolǵan qyzdyń anasy Salıma Omarovany jaýapqa tartýdy jalǵastyrý úshin saǵat 15:00-ge deıin úzilis jarıalanǵan. Barlyq qatysýshylar tyńdalymnyń qaıta bastalatyn ýaqyty týraly tıisti túrde habardar etilgen. Alaıda belgilengen ýaqytta advokat Eslámbekuly sot zalyna kelmegen jáne aldyn ala resmı túrde sotty eskertpegen. Onyń ornyna ol hatshyǵa telefon arqyly basqa sot prosesine ketkenin aýyzsha ǵana aıtqan.
«Advokat dáleldi sebepsiz qylmystyq is boıynsha prosesti buzdy. Osylaısha ol ádeıi istiń qaralýyn sozyp, sot pen proseske qatysýshylarǵa ashyq túrde qurmetsizdik tanytty. Onyń áreketteri advokattyq etıka sheginen shyǵyp ketti, bul kásibı maman úshin jol berilmeıdi», — dedi sýdıa Merýert Abaeva.
Sot qorǵaýshynyń áreketin «Advokattyq qyzmet jáne zań kómegi týraly» Zańdy, sondaı-aq advokattardyń kásibı etıka kodeksin óreskel buzý dep baǵalady. Sot qaýlysymen buzýshylyq faktileri Astana qalasy advokattar alqasy tóralqasynyń jáne QR Ádilet mınıstrliginiń qalalyq ádilet departamenti basshysynyń nazaryna jetkizildi. Organdarǵa advokat Eslámbekulyna qatysty tıisti tártiptik sharalar qoldaný jáne bir aı merzimde qabyldanǵan sheshim týraly sotqa resmı túrde habarlaý tapsyryldy.
Eske salaıyq, Astanada úıdiń OSI tóraıymy Sáýle Jýbanıazovaǵa qatysty sot jalǵasýda. Ol 2025 jylǵy 8 qarashadaǵy qaıǵyly oqıǵaǵa baılanysty óz mindetterine adal emes qarady dep aıyptalýda. Sol kúni 23 jastaǵy jedel járdem feldsheri Ýldana Myrzýan Astanadaǵy shaqyrtýǵa kelgende, oǵan ǵımarattyń kirpish qaptamasy men kondısıonerdiń bekitpesi qulaǵan edi.
Sot otyrysynyń úzilisinde Jýbanıazova jýrnalıser aldyna shyǵyp, qylmystyq is boıynsha óz ustanymyn bildirdi. OSI tóraıymy ózin jala jabylǵan dep sanaıtynyn, al qaıǵyly oqıǵanyń sebebi ǵımarattyń jasyryn aqaýlary men úıdiń kóp jyldyq paıdalanylýy ekenin málimdedi.
Aıta keteıik, sot ǵımaratynda is qaralyp jatqanda, syrtta Astananyń múlik ıeleri birlestikteriniń (OSI) ondaǵan tóraǵalary jınalyp, óz áriptesin qoldap, zańnamadaǵy júıeli máseleni kóterdi.