Astanada jeke derekter men aqsha qarajatyn alý maqsatynda fıshıngtik SMS jappaı jiberýdi uıymdastyrǵan qylmystyq toptyń áreketine jol berilmedi, dep habarlaıdy infohub.kz saıty.
Qarjylyq monıtorıń agenttiginiń málimetinshe, Ońtústik-Shyǵys Azıa elderiniń biriniń azamaty bıylǵy qańtarda aqyly túrde jergilikti turǵyndy Qazaqstan aýmaǵynda zańsyz áreketti uıymdastyrýǵa tartqan dep kúdiktenedi. Tergeý derekteri boıynsha, keıin bul sqemaǵa astanadaǵy jabdyqtyń jumysyn qamtamasyz etken basqa da adamdar qosylǵan.
Qylmyskerler uıaly baılanys bazalyq stansıasyn ımıtasıalaıtyn jáne operatorlardyń súzgi júıelerin aınalyp ótip, habarlamalardy jappaı jiberýge múmkindik beretin SMS-blaster qurylǵysyn qoldanǵan. Tórt kún ishinde Beeline, Kcell jáne Activ abonentterine belgili kompanıalar atynan bonýstardy aıyrbastaý usynystary bar shamamen 150 myń fıshıngtik SMS jiberilgen. Silteme boıynsha ótken paıdalanýshylar jalǵan saıtqa túsip, onda jeke jáne banktik derekterdi, onyń ishinde karta rekvızıtterin, CVV jáne rastaý SMS-kodyn engizý usynylǵan.
Osylaısha, kúdiktiler azamattardyń qupıa aqparaty men banktik qarajatyna qol jetkizgen. Tergeý anyqtaǵandaı, alynǵan SMS-blaster jedel-izdestirý is-sharalary men jasyryn tergeý áreketterine arnalǵan arnaıy tehnıkalyq qural bolyp tabylady.
Osy fakti boıynsha Qylmystyq kodekstiń 399-babynyń 2-bóligi «Aqparatty jasyryn alýdyń arnaıy tehnıkalyq quraldaryn zańsyz jasaý, óndirý, satyp alý, ótkizý nemese paıdalaný» boıynsha sotqa deıingi tergeý bastaldy. Qazirgi ýaqytta tórt kúdikti qamaýǵa alyndy. Tergeý jalǵasýda. Ózge aqparat Qazaqstan Respýblıkasy Qylmystyq-prosestik kodeksiniń 201-babyna sáıkes jarıa etilmeıdi.