Qazaqstan astanasynda Hyundai Palisade kóliginiń júrgizýshisi bıylǵy jyly jol qozǵalysy erejelerin 306 ret buzǵan, dep habarlaıdy infohub.kz saıty.
Astana prokýratýrasynyń málimetinshe, monıtorıń barysynda jol erejelerin júıeli túrde elemeıtin júrgizýshi anyqtaldy. Onyń 169 buzýshylyǵy belgilengen jyldamdyqty asyrýǵa, al 134 jaǵdaıda avtobýs jolaǵymen júrýine baılanysty.
Aıta keteıik, bıylǵy jyldyń 3 mamyrynda beınebaqylaý kameralary kóliktiń Uly dala dańǵylymen saǵatyna 137 shaqyrym jyldamdyqpen ótkenin tirkegen.
Qoǵamdyq qaýiptiligi men buzýshylyqtardyń júıeliligin eskere otyryp, sot júrgizýshiniń áreketin usaq buzaqylyq dep baǵalap, oǵan 10 táýlikke ákimshilik qamaqqa alý jazasyn taǵaıyndady.
Prokýratýrada bul tájirıbe prokýratýra men polısıa organdarynyń sot tártibindegi úılestirilgen jumysy aıasynda júzege asyrylyp, jaýapkershiliktiń bultartpastyǵy qaǵıdatyn qamtamasyz etýge jáne joldardaǵy qaýipti minez-qulyqtyń eń aýyr túrlerine jol bermeýge múmkindik beretinin atap ótti.
Júrgizýshiler jol qozǵalysy erejelerin qatań saqtaýǵa shaqyryldy.