Astanada Kenesary kóshesindegi lepnına elementteri bar ǵımarattyń qasbetin jóndeý qala turǵynynyń narazylyǵyn týdyrdy. Ol Threads áleýmettik jelisinde jarıa túrde shaǵymdandy. Jarıalanym avtoryn erekshe alańdatqany – jumystarǵa elordalyq ýrbanıstıka ortalyǵynyń qatysy barlyǵy, dep habarlaıdy infohub.kz saıty.
«Sizderdiń buǵan qatysyp jatqandaryńyzǵa sengim kelmeıdi! Astanada sizder jasaǵan qanshama tamasha joba bar, al Kenesary sáýletine osylaı qaraısyzdar ma? Ondaǵan jylǵa shydaǵan, biraq sizderdiń jańartýlaryńyzǵa shydamaıtyn lepnınaǵa armatýra salý degenińiz ne?» – dep jazdy áıel.
Osy ótinishke jaýap retinde Astana ýrbanıstıka ortalyǵy barlyq sáýlettik bólshekter men lepnına elementteri saqtalatynyna sendirdi.
«Olar aldyn ala skanerlenip, qazir bastapqy órnekte tabıǵı tastan qaıta jasalýda. Búgingi tańda bul elementter daıyndalý kezeńinde tur. Qasbettegi jumystar áli jalǵasýda, sondyqtan qazir kórip otyrǵanyńyz – túpkilikti nátıje emes», – dedi ýrbanıstıka ortalyǵynda.
Áıel ǵımarat avtory-sáýletshiniń oıyndaǵydaı bolyp qalýy úshin túpnusqa lepnınany nege qalpyna keltirýge bolmaıtynyn surady.
«Astana jaǵdaıynda sylaq qasbet, ókinishke qaraı, uzaqqa shydamaıdy, ýaqyt óte jarylyp, qabyrshaqtanady. Sondyqtan munda tabıǵı taspen uzaqqa tózimdi sheshim qabyldandy, bul rette barlyq sáýlet jáne sándik elementter saqtalady. Sonymen qatar, shatyrdy qosa alǵanda, búkil úı keshendi túrde jóndelýde. Jumystardyń aıaqtalýyn kútip, sodan keıin nátıjeni baǵalaıyq», – dep jaýap berdi ortalyq jarıalanym avtoryna.