Astana turǵyny Tóle bı men Syǵanaq kósheleriniń qıylysyndaǵy úzdiksiz kepteliske narazylyq bildirdi. Ol keptelistiń tek qarbalas ýaqytta ǵana emes, kúndiz jáne demalys kúnderi de týyndaıtynyn aıtty, dep habarlaıdy infohub.kz saıty.
Threads áleýmettik jelisindegi astdev_yerzhan degen paıdalanýshy óz jazbasynda astanalyq qıylystyń birinen ótý kezindegi aıtarlyqtaı qıyndyqtarǵa nazar aýdardy. Jazba avtory qala bıligin jol qozǵalysyn uıymdastyrýdy taldaýǵa, turaqty keptelistiń sebepterin anyqtaýǵa jáne osy ýchaskeniń ótkizý qabiletin arttyrý sharalaryn qoldanýǵa shaqyrdy.
NUR.KZ tilshisi Astana ákimdiginiń baspasóz qyzmetinen túsinikteme surady. Onda Tóle bı men Syǵanaq kósheleriniń qıylysynda LRT qurylysy júrgizilip jatqanyn túsindirdi.
«Syǵanaq kóshesi — elordanyń oń jáne sol jaǵalaýyn baılanystyratyn, qala turǵyndary suranysqa ıe negizgi kólik arterıalarynyń biri. Qurylys jumystaryna baılanysty jekelegen ýchaskelerde qozǵalys jobany iske asyrýdyń aǵymdaǵy kezeńderine saı uıymdastyrylǵan. Jol qozǵalysyn uıymdastyrýdyń ózgerýi ýaqytsha sıpatta jáne qurylys jumystaryn qaýipsiz ári dáıekti júrgizýdi qamtamasyz etýge múmkindik beredi. Jumystar qoldanystaǵy kólik jaǵdaıyn jáne kóshe-jol jelisi boıynsha qozǵalysty qamtamasyz etý qajettiligin eskere otyryp, kezeń-kezeńimen júrgizilýde», — dedi ákimdikte.
Turǵyndarǵa qurylys kezeńderi aıaqtalǵan saıyn jol jelisiniń ótkizý qabiletin qalpyna keltirý jáne odan ári arttyrý úshin jaǵdaı jasalatynyna sendirdi. LRT qurylysy zamanaýı ári tıimdi kólik júıesin qalyptastyrýǵa, halyqtyń utqyrlyǵyn arttyrýǵa jáne elorda turǵyndary men qonaqtarynyń júrip-turýyna qolaıly jaǵdaı jasaýǵa baǵyttalǵany atap ótildi.