Astana turǵyny áleýmettik jelide qorlaǵan áıeline aıyppul tóleıdi. Amnıstıa zańynyń arqasynda negizgi jaza taǵaıyndalmady, dep habarlaıdy infohub.kz saıty.
Sot baspasóz qyzmetiniń málimetinshe, Astanada L.-ǵa qatysty úkim jarıalandy. Ol J.-ny qorlady, onyń ar-namysy men qadir-qasıetin túsiretin sózder aıtty dep aıyptaldy.
Habarlamada: "Aıyptalýshy L. áleýmettik jelini paıdalanyp, jábirlenýshi J.-ǵa onyń ar-namysy men qadir-qasıetin túsiretin qorlaıtyn sózder aıtqan. Sot otyrysynda L. kinásin moıyndap, jábirlenýshiden keshirim suraýǵa daıyn ekenin bildirdi jáne azamattyq talapty ishinara moıyndady. Qorlaıtyn sózder faktisi beınejazbany psıhologıalyq jáne fılologıalyq zertteý nátıjeleri boıynsha mamannyń qorytyndysymen rastalady", - delingen.
Jábirlenýshi J. aıyptalýshyny keshirmeıtinin málimdep, oǵan zańda kózdelgen jazany taǵaıyndaýdy surady, jumsalǵan shyǵyndardy óndirý jáne moraldyq zıandy óteý týraly azamattyq talapty qoldady. Baptyń sanksıasy 200 AEK-ke deıingi mólsherde aıyppul nemese sol mólsherde túzeý jumystary ne 180 saǵatqa deıingi merzimge qoǵamdyq jumystarǵa tartý túrindegi jazany kózdeıdi.
Sot L.-ǵa 30 AEK mólsherinde aıyppul taǵaıyndady, bul 129 750 teńgeni quraıdy. "QR jańa Konstıtýsıasynyń qabyldanýyna baılanysty amnıstıa týraly" zańynyń arqasynda aıyptalýshy negizgi jazadan bosatyldy.