Kókshetaý polıseıleri Astanada 59 jastaǵy qala turǵynynan 10 mln teńgeden astam aqsha alǵan kýrerdi izin sýytpaı ustady, dep habarlaıdy infohub.kz saıty.
Aqmola oblysy polısıa departamentiniń baspasóz qyzmeti málim etkendeı, 11 qyrkúıekte Kókshetaý polısıa basqarmasyna ınternet-alaıaqtyq týraly aryz túsken. Áıel belgisiz adamdardyń ózderin quqyq qorǵaý organdarynyń qyzmetkerleri retinde tanystyryp, ony iri kólemde aqsha berýge kóndirgenin aıtqan.
Qylmyskerlerdiń nusqaýymen zardap shekken áıel 10 mln teńgeden astam qarajat jınap, kelgen kýrerge paketti tapsyrǵan. Er adam aqshamen ketken soń ǵana áıel alaıaqtyqtyń qurbany bolǵanyn túsinip, dereý polısıaǵa júgingen.
«Ýaqtyly júginýdiń arqasynda polıseıler kýrerdiń jeke basyn birden anyqtady. Alǵashqy jedel-izdestirý is-sharalary barysynda er adamnyń Astanada turatyny belgili boldy. Polıseıler dereý astanaǵa attandy. Tórt saǵattan astam ýaqyt boıy qyzmetkerler kúdiktini izdestirdi. Qabyldanǵan sharalardyń nátıjesinde er adam anyqtalyp, ustaldy. Onyń qasynan zardap shekken áıelge tıesili aqsha tabylyp, tárkilendi. Qýanyshqa oraı, qylmysker alynǵan somanyń barlyǵyn aýdaryp úlgermegen», — dedi Aqmola oblysy PD-da.
Ustalǵan er adam Kókshetaýǵa baryp, aqsha salynǵan paketti alý týraly telefon qońyraýy kelgenin túsindirdi.
Qazirgi tańda qajetti tergeý jáne jedel is-sharalar júrgizilýde. Polıseıler ustalǵan adamnyń basqa da osyǵan uqsas qylmystarǵa qatysy bolýy múmkindigin anyqtap jatyr.