Astanada mektep formasynyń túsine baılanysty daý týyndady: №63 mekteptiń oqýshysynyń anasy qara shalbar kıgeni úshin aıyppul tóleý qaýpi týraly shaǵymdandy. Elordalyq bilim basqarmasy mektepterde qara kıimge ruqsat etilgenin, al aıyppul týraly aqparat shyndyqqa sáıkes kelmeıtinin málimdedi, dep habarlaıdy infohub.kz saıty.
Áıeldiń aıtýynsha, onyń balasy sabaqqa qara shalbar, aq kóılek jáne qara keýdeshe kıip kelgen. Osydan keıin mektepten oǵan formaǵa qatysty talap qoıyp qońyraý shalǵan.
«Formaǵa baılanysty jetekshi qońyraý shalyp, tikeleı aıtady: "Kelińiz, aıyppul tóleısiz". Qara shalbar úshin aıyppul, kók shalbardyń ornyna? Shynymen be? Shalbardyń túsi oqýǵa qalaı áser etedi?» — dep jazdy ol Threads-te.
Áıel bul shalbarmen oqýshynyń ótken oqý jylynda da sabaqqa barǵanyn, sol kezde kıimge eshqandaı talap bolmaǵanyn atap ótti.
«Formaǵa talaptar bolsa, qarapaıym eskertý jasaýǵa bolar edi. Biraq shalbardyń túsine baılanysty ata-anaǵa birden aıyppul týraly aıtý — bul artyq. Qandaı negizde aıyppul tóleýdi talap etedi?» — dep ashýlandy ana.
Astana qalasynyń bilim basqarmasy otbasyna aıyppul qaýpi tónip turǵany týraly aqparatty joqqa shyǵardy. Sondaı-aq elordalyq mektep oqýshylaryna kók jáne qara tústi forma kıýge ruqsat etilgenin naqtylady.
«Atalǵan mekteptiń oqýshylarynyń ata-analaryna mektep formasynyń túsi úshin aıyppul salynady degen aqparat shyndyqqa sáıkes kelmeıdi», — dep túsindirdi vedomstvo.
Shaǵymnan keıin №63 mektep ákimshiligine pedagogtar men ata-analarmen qosymsha túsindirý jumystaryn júrgizý tapsyryldy. Basqarma sondaı-aq mektep formasyna qoıylatyn talaptardy burmalaýǵa jol bermeýdi talap etti.
Buǵan deıin «Kýrsıv» Oral qalasyndaǵy oqýshylardyń ata-analaryn balalardyń shash úlgisine qoıylatyn talaptar jazylǵan jadynamalar ashýlandyrǵanyn jazǵan bolatyn.