Astanada jas pedagogtar ótken zamannyń belgili qoǵam qaıratkeri – Ahmet Baıtursynovtyń erekshe portretin jasady. Bul jumysqa olarǵa 5 myńǵa jýyq shege men 600 metr jip qajet boldy, dep habarlaıdy infohub.kz saıty.
Elordalyq ákimdiktiń málimetinshe, 3×2 metrlik ınstallásıa aǵartýshynyń 154 jyldyǵyna oraı String art tehnıkasynda jasalǵan.
Jobany Ahmet Baıtursynov atyndaǵy №48 mektep-lıseıiniń muǵalimderi oılap tapqan. Ony jasaýǵa 14 kún ketti.
«Aldymen proektordyń kómegimen Baıtursynovtyń beınesi aǵash panelge túsirilip, kontýrlary belgilendi. Sodan keıin negizge 5 myńǵa jýyq shege qaǵyldy, odan soń pedagogtar olardyń arasyna jipterdi óre otyryp, birtindep portretti qalyptastyrdy», – dedi joba avtorlary.
Muǵalimder bul jumys tek kórkem ınstallásıa ǵana emes, mekteptiń mádenı keńistiginiń bir bóligine aınalǵanyn atap ótti. Daıyn portretti pedagogtar mektep murajaıyna syıǵa tartty.
Endi bul týyndy oqýshylar men mektep qonaqtaryn Ahmet Baıtursynovtyń tulǵasy men murasymen zamanaýı óner arqyly tanystyratyn bolady.