Astanadaǵy «Nurly Jol» temirjol vokzalynda shetel azamattaryna qujattardy zańsyz resimdeý sqemasynyń joly kesildi. İs boıynsha 10 adam sottaldy, dep habarlaıdy infohub.kz.
Anyqtalǵandaı, zańsyz áreketke kóshi-qon qyzmetiniń qyzmetkeri, «Azamattarǵa arnalǵan úkimet» memlekettik korporasıasynyń tórt qyzmetkeri jáne bes deldal qatysqan. Olar aqshalaı syıaqy úshin sheteldikterge belgilengen talaptardy aınalyp ótip, ýaqytsha turýǵa jáne eńbek qyzmetine qujattardy resimdeýge kómektesken.
İs materıaldary boıynsha, deldaldar elektrondy kezeksiz memlekettik qyzmetterge basym qoljetimdilikti qamtamasyz etken. Kedergisiz resimdeý úshin kóshi-qon qyzmeti qyzmetkeriniń qyzmettik múmkindikteri paıdalanylǵan. Qyzmet aqysy júıeli túrde aýdarylyp otyrǵan, onyń ishinde onyń jaqyn týystarynyń banktik shottaryna da.
Kólik polısıasy departamentinde tegin memlekettik qyzmet osylaısha sheteldikterdi zańdastyrýdyń aqyly tetigine aınalǵanyn atap ótti.
Tergeý UQK Shekara qyzmetimen birlesip, Bas kólik prokýratýrasynyń úılestirýimen júrgizildi. Tergeý qorytyndysy boıynsha is sotqa joldandy.
Astana qalasynyń qylmystyq ister jónindegi aýdanaralyq sotynyń úkimimen barlyq 10 aıyptalýshy kináli dep tanyldy. Olardyń bir bóligi úsh jyldan jeti jylǵa deıin bas bostandyǵynan aıyrylsa, qalǵandaryna bas bostandyǵyn shekteý jáne aıyppul taǵaıyndaldy.
Buǵan deıin Qazaqstannan ruqsat etilgen merzimnen asyp ketken Úndistannyń 35 azamaty shyǵarylǵany habarlanǵan bolatyn. Sondaı-aq, sheteldikterdiń ýaqytyly ketýin qamtamasyz etpegen qabyldaýshy taraptar ákimshilik jaýapkershilikke tartyldy.