Astanadaǵy turǵyn úı keshenderiniń birinde otbasylyq janjal erli-zaıyptylardyń ekeýiniń de ólimimen aıaqtaldy. Kórshilerdiń aıtýynsha, qaıǵyly oqıǵa aldynda áıel birneshe ret podezge júgirip shyǵyp, kómek suraǵan, dep habarlaıdy infohub.kz saıty.
Eske salaıyq, elordalyq turǵyn úı keshenderiniń biriniń toǵyzynshy qabatynda 55 jastaǵy er adam men onyń 53 jastaǵy jubaıy qaza tapqan. Polısıa dereginshe, ekeýiniń arasynda janjal bolǵan. Er adam áıelge pyshaq salyp, keıin ózine de jaraqat tıgizgen. Ekeýi de dárigerler kelgenge deıin kóz jumdy. Barlyǵy olardyń kámeletke tolmaǵan balasynyń kózinshe bolǵan.
«Jetinshi arna» jýrnalıseri oqıǵadan keıingi kúni sol turǵyn úı keshenine barǵan. Páterge izdeý salynyp, tóńirekte qandy izder qalǵan. Telearna málimetinshe, kilemde aıaqtyń qandy izi, qabyrǵada — qoldyń izi bolýy múmkin daq kóringen.
Páterlerdiń biriniń ıeleri bul jerge tórt jyl buryn kóship kelgenderin, qaza tapqan juptyń ol kezde de osynda turǵanyn aıtty. Kórshi áıel eshqandaı janjaldy baıqamaǵanyn eske alady. Ol bul qonaqtary jıi keletin, esigi únemi ashyq turatyn qarapaıym otbasy dep oılaǵan. Sondyqtan bolǵan oqıǵa ony qatty shoshytqan.
«Keshki saǵat 10:30 shamasynda aıqaı estildi, shamamen úsh mınýttaı aıqaı estip, ol basyldy. Eki ret, meniń túsinýimshe, ol podezge júgirip shyqty, bálkim qashyp ketpek boldy ma, álde qalaı, bilmeımin. Keıin jedel járdem keldi, mılısıa keldi, sodan keıin birdeńe bolǵanyn túsindik», — deıdi ol.
Turǵyndardyń aıtýynsha, sol qaıǵyly túni áıel aıqaılap, kómek suraǵan, keıin er adamnyń daýysy estilgen: «Ne istep qoıdym men?». Sodan keıin tynyshtyq ornaǵan, deıdi kórshiler.
Al sol páterdiń astynda turatyn taǵy bir kórshisi Baqjamal Keshirbaevanyń aıtýynsha, erli-zaıyptylardyń aıqaıy men janjaly tek sol túni ǵana estilmegen.
«Bul úıde janjaldar bolyp turdy. Ótken jyly jıi estıtinbiz. Biz ÚIK ókilimen birge olarǵa baryp, eskertý jasadyq. „Sender eresek adamsyńdar ǵoı, osyny qoıyńdar“ dedik. Ol ishimdik ishetin bolyp shyqty. Sonda úı ıesi polısıa shaqyryp, ol eki kúnge qamaldy. Ol qaıtyp kelgen soń, qaıtadan janjal shyǵarǵan bolýy kerek», — deıdi kórshisi Baqjamal Keshirbaeva.
Polısıa qazir tergeý júrip jatqanyn, ol otbasylyq dramanyń barlyq sebepteri men mán-jaıyn anyqtaıtynyn habarlady.
«Janjal barysynda er adam jubaıyna pyshaq salyp, keıin ózine de pyshaq salǵany anyqtaldy. Alǵan jaraqattarynan ekeýi de oqıǵa ornynda qaza tapty», — dep eske saldy Astana qalalyq PD aqparattyq saıasat bóliminiń basshysy Elmıra Shaýlenova.
Aıta keteıik, juptyń bes balasy qaldy, tórteýi eresek, kámeletke tolǵan. Al kishi uly 14 jasta, ol da qaıǵyly túni páterde bolǵan. Qazir onymen psıhologtar jumys istep jatyr, bala aǵa-ápkeleriniń qolynda.