Astanada qaıǵyly oqıǵa boldy: otbasylyq janjal kezinde erli-zaıyptynyń ekeýi de qaza tapty. Kórshilerdiń aıtýynsha, oqıǵaǵa 12 jáne 14 jastaǵy eki bala kýá bolǵan. Bul týraly infohub.kz saıty habarlaıdy.
NUR.KZ tilshisiniń málimetinshe, oqıǵa «Shyǵys» turǵyn úı kesheninde bolǵan. «Krımınalnyı Kazahstan» pablıginiń dereginshe, 55 jastaǵy er adam janjal barysynda 53 jastaǵy áıeline pyshaq jaraqatyn salyp, keıin ózine de pyshaq jaraqatyn salǵan. Alǵan jaraqattarynan ekeýi de oqıǵa ornynda kóz jumdy.
«Kórshilerdiń aıtýynsha, bolǵan oqıǵa 12 jáne 14 jastaǵy eki balanyń kózinshe boldy», — delingen jarıalanymda.
NUR.KZ tilshisi Astana qalalyq polısıa departamentine suraý joldady. Vedomstvo aqparatty rastady.
«Kisi óltirý jáne sýısıd faktisi boıynsha qylmystyq is qozǵaldy. Erli-zaıyptylar arasyndaǵy janjal kezinde 55 jastaǵy er adam 53 jastaǵy áıeline pyshaq jaraqatyn salyp, keıin ózine de pyshaq jaraqatyn salǵany anyqtaldy. Alǵan jaraqattarynan ekeýi de oqıǵa ornynda kóz jumdy», — delingen habarlamada.
Qazirgi tańda bolǵan oqıǵanyń barlyq sebepteri men mán-jaıyn anyqtaýǵa baǵyttalǵan jan-jaqty tergeý júrgizilip jatqany atap ótildi.
«QR QPK-niń 201-babyna sáıkes ózge aqparat jarıalaýǵa jatpaıdy», — dep qosty polısıa.