Astananyń eki turǵyny túngi ýaqytta turǵyn úı aýlalarynda salút atyp, bes táýlikke qamaldy. Jigitter dostaryn týǵan kúnimen quttyqtaǵysy kelgen, alaıda qala turǵyndarynyń tynyshtyǵyn buzǵan, dep habarlaıdy infohub.kz.
Alǵashqy oqıǵa Saryarqa aýdanynda boldy. Elordanyń 18 jastaǵy turǵyny Yqylas Dúkenuly kóshesindegi úıdiń aýlasynda salút atqan. Qatty dybys jergilikti turǵyndardy oıatyp, olar polısıaǵa habarlasqan.
Uqsas jaǵdaı Esil aýdanynda tirkeldi. Onda 24 jastaǵy er adam Ál-Farabı dańǵylyndaǵy turǵyn úıdiń janynda túngi salút uıymdastyrǵan. Ol da dosyn quttyqtaǵysy kelgenin aıtqan.
Ekeýi de usaq buzaqylyq úshin ákimshilik jaýapkershilikke tartyldy. Sot olardyń árqaısysyna bes táýlik qamaý jazasyn taǵaıyndady.
«Turǵyn úı aýlalarynda túngi ýaqytta pırotehnıkalyq buıymdardy qoldaný kóptegen azamattardyń múddesine nuqsan keltiredi. Polısıa mundaı faktilerge dereý jaýap berip, buzýshylardy anyqtaıdy jáne zańda kózdelgen sharalardy qoldanady», — dedi Astana qalalyq PD qoǵamdyq qaýipsizdik basqarmasynyń bastyǵy Marat Ómirbaev.
Polısıa týǵan kúndi toılaý qoǵamdyq tártipti saqtaý mindetinen bosatpaıtynyn eske saldy. Aýlalarda kesh ýaqytta pırotehnıkany atý zań buzýshylyq bolyp sanalady jáne jaýapkershilikke ákep soǵady.