Astanada 20 jastaǵy jigit turǵyn úı aýlasyndaǵy shlagbaýmdy qasaqana buzyp, ákimshilik jaýapkershilikke tartyldy. Bul týraly infohub.kz saıty habarlaıdy.
Astana qalalyq polısıa departamentiniń baspasóz qyzmeti málimdeýinshe, oqıǵa Baýyrjan Momyshuly dańǵyly boıyndaǵy turǵyn úı aýlasynda bolǵan. Jigit shlagbaým qurylǵysyna birneshe ret aıaǵymen soqqy jasap, ony tolyǵymen búldirip, materıaldyq shyǵyn keltirgen. Oqıǵanyń beınejazbasy áleýmettik jelige tarady.
Osy derek boıynsha sot sheshimimen azamatqa 50 aılyq eseptik kórsetkish mólsherinde, ıaǵnı 216 250 teńge kóleminde ákimshilik aıyppul salyndy.
Polısıa sondaı-aq jyl basynan beri elordalyq quqyq qorǵaý organdary bóten múlikti qasaqana búldirýdiń 120-dan astam deregin anyqtap, árqaısysy boıynsha tıisti sharalar qoldanǵanyn atap ótti.
«Qoǵamdyq tártipti saqtaý jáne múlikke uqypty qaraý — qaýipsiz ári jaıly qalalyq ortanyń mańyzdy quramdas bóligi. Bóten múlikti, sonyń ishinde turǵyn úı aýlalaryndaǵy ınfraqurylym elementterin qasaqana búldirý — zıansyz áreket emes, ol zańda kózdelgen jaýapkershilikke ákep soǵady», — dedi quqyq qorǵaý organdarynda.
Astana polısıasy bóten múlikti búldirý derekterin anyqtaý jáne jolyn kesý boıynsha turaqty túrde sharalar qoldanyp kele jatqany belgili boldy.
«Bóten múlikti búldirý jasalǵan árekettiń sıpaty men mán-jaıyna qaraı Qazaqstan Respýblıkasynyń zańnamasynda kózdelgen jaýapkershilikke ákep soǵady. Turǵyndardy bóten múlikke uqypty qaraýǵa, belgilengen normalardy saqtaýǵa jáne qoǵamdyq tártipti buzatyn áreketterge jol bermeýge shaqyramyz», — dep eske saldy polısıa departamentinde.