Astananyń Baıqońyr aýdanynda Taraz kóshesinde ruqsat qujattarynsyz, mundaı nysanǵa arnalmaǵan ýchaskede salynǵan ózine-ózi qyzmet kórsetetin kólik jýý ornyn buzý bastaldy, dep habarlaıdy infohub.kz saıty.
Astana ákimdiginiń málimetinshe, nysan turǵyn úılerge tym jaqyn ornalasyp, jergilikti turǵyndarǵa qolaısyzdyq týǵyzǵan. Buǵan deıin elordalyq memlekettik sáýlet-qurylys baqylaýynyń ınspektorlary zańsyz qurylys ıesine buzýshylyqtardy joıý qajettigin eskertken, alaıda ol bul talaptardy elemegen.
«MSQB basqarmasy bul nysan boıynsha jospardan tys tekserý júrgizdi. Tekserý qorytyndysy boıynsha menshik ıesine qatysty ákimshilik sharalar qoldanylyp, anyqtalǵan buzýshylyqtardy joıý týraly nusqama berildi. Nusqama oryndalmaǵandyqtan, basqarma nysandy buzý týraly sot talabyn qozǵady», — dep túsindirdi Astana memlekettik sáýlet-qurylys baqylaýy basqarmasynyń bas mamany Ómirjan Kereıhan.
Talas-tartys segiz aıǵa sozylyp, nysandy buzý týraly sot sheshimimen aıaqtaldy.
Aıta keteıik, búgingi tańda basqarma 341 jospardan tys tekserý júrgizip, buzýshylyqtardy joıý týraly 182 nusqama berdi, jalpy somasy 265 mln teńgeden asatyn 702 ákimshilik aıyppul saldy.
«Qala turǵyndaryn sáýlet, qala qurylysy jáne qurylys qyzmeti salasyndaǵy zań talaptaryn saqtaýǵa shaqyramyz. Sondaı-aq atalǵan zańdy saqtamaý ákimshilik jaýapkershilikke ákep soǵatynyn eske salamyz», — dedi ákimdikte.