Astanada terezeden dáretke otyrǵan er adamǵa qatysty sot sheshimi shyqty. Ol usaq buzaqylyq jasaǵany úshin kináli dep tanylyp, 10 táýlikke qamaýǵa alyndy, dep habarlaıdy infohub.kz.
Astana sottarynyń baspasóz qyzmetiniń málimetinshe, Astananyń mamandandyrylǵan aýdanaralyq ákimshilik quqyq buzýshylyqtar jónindegi soty azamat J.-ǵa qatysty ÁQBtK-niń 434-babynyń 1-bóligi boıynsha qaýly shyǵarǵan.
Buǵan deıin áleýmettik jelilerde turǵyn úıdiń baspaldaq alańynda qoǵamdyq tártiptiń buzylǵanyn kórsetetin beınejazba taraǵan edi. Sotta 24 tamyzda saǵat 00:30 shamasynda J. baspaldaq alańynda turyp, podezd terezesinen syrtqa dáretke otyrǵany, osylaısha usaq buzaqylyq jasaǵany anyqtaldy.
Sot otyrysynda J. kinásin moıyndap, ókingenin bildirdi. Onyń kinási is materıaldarymen jáne beınejazbamen rastaldy.
ÁQBtK-niń 434-babynyń 1-bóliginiń sanksıasy 20 AEK (86 500 teńge) mólsherinde aıyppul nemese 20 saǵattan 60 saǵatqa deıin qoǵamdyq jumystarǵa tartý, ne 5 táýlikten 15 táýlikke deıin ákimshilik qamaýǵa alýdy kózdeıdi.
Jaza taǵaıyndaý kezinde sot is-árekettiń sıpatyn, qoǵamǵa degen qurmetsizdikti jáne áleýmettik jelilerdegi áreketterdiń jarıa bolýyn eskerdi. Sot qaýlysymen J. ÁQBtK-niń 434-babynyń 1-bóligi boıynsha kináli dep tanylyp, 10 táýlik merzimge ákimshilik qamaýǵa alý túrindegi ákimshilik jazaǵa tartyldy. Qaýly zańdy kúshine engen joq.
Eske salaıyq, buǵan deıin Astana polısıasy kópqabatty úıdiń terezesinen dáretke otyryp, jelide rezonans týdyrǵan er adamdy izdegen bolatyn.