Astanada Túrkıaǵa vıza rásimdeý kezinde ınternet-alaıaqtyq jasady degen kúdikke ilingen 28 jastaǵy er adam ustaldy. İshki ister mınıstrliginiń málimetinshe, jábirlenýshi oǵan 600 myń teńge aýdarǵan, alaıda ýáde etilgen qyzmetti ala almaǵan, dep habarlaıdy infohub.kz.
Kúdikti áleýmettik jeliler men messendjerler arqyly klıentter taýyp, ózin senimdi deldal retinde tanystyryp, túrik vızasyn alýǵa kómektesetinin aıtqan.
Ol klıentterdiń birin qujattardy daıyndaý jáne vıza rásimdeý úshin aldyn ala tólem jasaýǵa kóndirgen. Aqshany alǵan soń, er adam ártúrli syltaýlarmen qyzmetti keıinge shegerip, keıin múldem baılanysqa shyqpaı qoıǵan.
Jábirlenýshige keltirilgen shyǵyn 600 myń teńgeni quraǵan.
Kúdiktiniń tulǵasy Hi-Tech jedel-profılaktıkalyq is-sharasy barysynda anyqtalǵan. Ol ustalyp, qazirgi ýaqytta oqıǵa boıynsha sotqa deıingi tergeý júrgizilýde.
İİM eskertedi: «Vıza rásimdeý, jumysqa ornalasý nemese ózge de aqyly qyzmetter úshin aldyn ala tólem aýdarar aldynda qyzmet kórsetýshiniń qyzmetiniń zańdylyǵy men senimdiligine kóz jetkizý qajet».
Polısıa kúmándi deldaldarǵa ınternette aqsha aýdarýdy usynbaıdy, resmı uıymdar men lısenzıalanǵan agenttikterge júginýge keńes beredi.
Buǵan deıin «Kýrsıv» qazaqstandyqtardyń AQSh vızasyn alý kezinde kezdesetin qıyndyqtar týraly habarlaǵan bolatyn. Týrısik jáne iskerlik vızalar boıynsha bas tartý deńgeıi 51,75%-ǵa jetken, al suhbat kútý Almatyda orta eseppen 45 kún, Astanada 90 kúnge deıin sozylady. Konsýldyq alym 185 dollardy quraıdy. Sonymen qatar, jalǵan anyqtamalar, jalǵan brondar nemese burynǵy bas tartýlardy jasyrý arqyly vıza alý múmkindigin arttyrý áreketi AQSH-qa kirýge kóp jyldyq tyıym salýǵa ákelýi múmkin.