Atyraýdyń burynǵy ákimi Shakır Keıkın úsh jyldan astam basqarǵan qala basshysy qyzmetinen ketken soń turǵyndarǵa úndeý jasady. Ol tıisti jazbany Instagram paraqshasynda jarıalady, dep habarlaıdy infohub.kz saıty.
«2023 jyldyń shildesinen búginge deıin Atyraýdyń basshysy bolyp, týǵan qalamyzdyń damýyna óz úlesimdi qosý múmkindigine ıe bolǵanymdy úlken jaýapkershilik ári qurmet dep sanaımyn», — dedi Shakır Keıkın.
Ol osy ýaqyt ishinde ınfraqurylymdy damytý, joldardy jóndeý, abattandyrý, kógaldandyrý, áleýmettik nysandardyń jaǵdaıyn jaqsartý jumystary atqarylǵanyn qosty. «Qalanyń damýy — bir adamnyń ǵana emes, barlyq turǵynnyń eńbeginiń nátıjesi», — dep jazdy eks-ákim.
Onyń aıtýynsha, bul jyldary qala turǵyndarymen júzdegen kezdesý ótkizilip, olardyń usynystary men tilekteri tyńdaldy, eshbir másele nazardan tys qalmady.
«Oblys basshylyǵyna, áriptesterime, qalanyń barlyq mekemeleri men uıymdarynyń qyzmetkerlerine, eńbek adamdaryna, qoǵamdyq uıymdar men belsendilerge, eń bastysy, maǵan kórsetken senimderi men qoldaýlary úshin Atyraýdyń árbir turǵynyna alǵys bildiremin», — dedi burynǵy qala basshysy.
Ol ákim qyzmetindegi jyldar ózi úshin úlken mektep bolǵanyn atap ótip, barshaǵa zor densaýlyq pen otbasylyq bereke tiledi. «Al súıikti Atyraý qalasyna — turaqty damý men odan ári tabys tileımin», — dep qorytyndylady Shakır Keıkın.
Eske salaıyq, ol Atyraý ákimi qyzmetin 2023 jyldyń shildesinen bastap atqarǵan. Búgin onyń qyzmetten ketkeni belgili boldy. Bıylǵy maýsymda Atyraý ákiminiń orynbasary Meıirjan Muqasovtyń ustalǵany týraly aqparat taraǵan. UQK tergeýge deıingi tergep-tekserý júrgizilip jatqanyn málimdedi.
Sondaı-aq áleýmettik jelilerde qala ákiminiń m.a. Tılek Mahýovtyń ustalǵany týraly aqparat tarady. UQK de tergeýge deıingi tergep-tekserý júrgizilip jatqanyn málimdedi.
Ustaýlar týraly jańalyqtardan keıin Atyraý turǵyndary qala ákimi Shakır Keıkınniń qaıda ekenin jáne nege kópshilik aldyna shyǵýyn toqtatqanyn suraı bastady. Atyraý ákimdigi onyń eńbek demalysynda bolǵanyn, biraq jumysqa shyǵyp, óz mindetterin atqaryp jatqanyn jaýap berdi.