Atyraýda bir banka merzimi ótken balalar púresi jergilikti dúkenge iri aıyppul ákeldi. Oqıǵa Atyraý – Dossor tas jolyndaǵy saýda ortalyqtarynyń birinde bolǵan, dep habarlaıdy infohub.kz saıty.
Sanıtarıalyq-epıdemıologıalyq baqylaý qyzmetkerleri satylymda jaramdylyq merzimi ótip ketken balalar taǵamynyń qaptamasyn anyqtady. Bul buzýshylyq úshin kompanıa Ákimshilik quqyq buzýshylyq týraly kodekstiń 425-babynyń 1-bóligine sáıkes ákimshilik jaýapkershilikke tartylyp, 6 mıllıon 920 myń teńge aıyppul salyndy.
Alaıda dúken mundaı sheshimmen kelispeı, sotqa júginip, bul taýardyń bir ǵana danasy ekenin aıtty. Kompanıa ókilderi buzýshylyq júıeli nemese jappaı sıpatta bolmaǵanyn, al merzimi ótken ónim sórede qyzmetkerdiń ýaqytynda alyp tastamaýy saldarynan qalǵanyn alǵa tartty.
Bastapqyda dúken aıyppuldy tolyǵymen joıýdy jáne is júrgizýdi toqtatýdy surady. Biraq sot otyrysy barysynda ókil kinásin moıyndap, aıyppul somasyn barynsha azaıtýdy ótindi.
Sot buzýshylyq faktisi rastaldy degen qorytyndyǵa keldi: jaramdylyq merzimi ótken tamaq ónimderin satý, mundaı taýardyń sanyna qaramastan, tyıym salynǵan. Sonymen qatar, jeńildetetin mán-jaılar eskerildi. Ákimshilik quqyq buzýshylyq týraly kodeks mundaı jaǵdaılarda aıyppul mólsherin 30 paıyzdan aspaıtyn mólsherde qysqartýǵa múmkindik beredi.
Nátıjesinde aıyppul 6 mıllıon 920 myń teńgeden 4 mıllıon 844 myń teńgege deıin tómendetildi. Dúkenniń shaǵymy ishinara qanaǵattandyryldy.