Atyraýda turǵyndar shaǵymdanǵan sasyq ıis pen las aýanyń sebepteri áli de anyqtalyp jatyr. Qyrkúıek aıynyń basynda jekelegen monıtorıń beketterinde kúkirtsýtektiń joǵary konsentrasıasy tirkeldi. Ekologıa mınıstrligi lastanýdyń negizgi kózderin atap, jospardan tys tekserý týraly habarlady, dep jazady infohub.kz saıty.
Qalada kúkirtsýtek boıynsha shekten asý derekteri tirkelýde. Mınıstrliktegiler qaladaǵy kúkirtsýtektiń konsentrasıasy álsiz jelde jáne túnde, lastaýshy zattar nashar taraǵan kezde artatynyn túsindirdi.
Lastanýdyń negizgi kózderi retinde Atyraý munaı óńdeý zaýyty, «Atyraý oblysy Sý Arnasy» KMK-nyń káriz nysandary, «Kvadrat» býlandyrý alańy, jylytý qazandyqtary men JEO ataldy.
8 qyrkúıekte Atyraý oblysy boıynsha ekologıa departamenti atmosferalyq aýanyń sapasyna jospardan tys tekserý bastady.
İri kásiporyndarda avtomattandyrylǵan monıtorıń júıeleri ornatylǵan. Olar shyǵaryndylar týraly derekterdi qorshaǵan orta men tabıǵı resýrstardyń jaǵdaıy týraly ulttyq derekter bankine jiberedi.
«Úzdik qoljetimdi tehnıkalardy, kásiporyndardaǵy avtomattandyrylǵan monıtorıń júıesin engizý, qoldanystaǵy zańnama talaptaryn saqtaý atmosferalyq aýanyń lastaný deńgeıin tómendetýge múmkindik beredi», — delingen Ekologıa mınıstrliginiń habarlamasynda.
Vedomstvo sondaı-aq shyǵaryndylardy qysqartý jáne júıelerdi jańǵyrtý jónindegi sharalar týraly málimdedi.
Buǵan deıin Atyraý oblysynyń ákimi Bolat Aqsholaqov shuǵyl aparattyq jınalys ótkizip, munaı astanasyndaǵy ekologıalyq ahýaldyń syn shegine jetkenin resmı túrde moıyndady. Óńir basshysy zaýyttardy tekserýdi tapsyrdy.
Buryn «Kýrsıv» Atyraý munaı óńdeý zaýyty qańtardaǵy shyǵaryndylary úshin 520 mln teńge aıyppul salynǵanyn jazǵan bolatyn.