Atyraýda muryndaǵy polıpti josparly túrde alý operasıasy qaıǵyly jaǵdaımen aıaqtaldy: 16 jastaǵy oqýshy qyz kóz jumdy. Ota jasalǵan soń qyzdyń jaǵdaıy kúrt nasharlap, shamamen bir saǵattan keıin ol reanımasıa bólimshesine aýystyryldy, dep habarlaıdy infohub.kz saıty.
«Aq Jaıyq» basylymynyń dereginshe, oqýshy qyz Atyraý oblystyq balalar aýrýhanasyna muryndaǵy polıpti alý úshin josparly otaǵa túsken. Áleýmettik jelilerde taraǵan beınejazbada ota jasaǵan hırýrg qyzdyń murnyna ádette bir táýlikke qaldyrylatyn tampon qoıylǵanyn aıtqan.
Sol jazbadaǵy anestezıolog dáriger tamponnyń bar ekenin bilmegenin málimdedi. Onyń aıtýynsha, bir sátte naýqas óz betimen tynys alýdy toqtatqan.
«Tamponnyń jyljyǵanyn baıqamadym. Ol tynys alýdy toqtatty. Tekserip kórgende oń jaǵynan tynys joq ekeni anyqtaldy. Keıin ony rentgen arqyly anyqtadyq», — deıdi dáriger.
Medıkterdiń áńgimesinen otadan keıingi kezeńde tamponnyń ornalasýyna jáne tynys alýdyń buzylýyna baılanysty másele týyndaǵany baıqalady. Reanımatolog dáriger tamponnyń ýaqytynda alynǵanyn habarlady. Odan keıin qyz taǵy 18 kún reanımasıada jatyp, qarqyndy em qabyldady. Emge qaramastan, onyń jaǵdaıy odan ári nasharlaı berdi. Sonyń saldarynan ol kóz jumdy.
Oqýshy qyzdyń ata-anasy qaıǵyly jaǵdaı medısına qyzmetkerleriniń áreketinen bolýy múmkin dep eseptep, otadan keıingi alǵashqy saǵattarda naqty ne bolǵanyn, balaǵa kómektiń qanshalyqty ýaqytynda kórsetilgenin jáne týyndaǵan asqyný keıingi qaıtymsyz saldarǵa ákelýi múmkin bolǵanyn anyqtaýdy talap etip otyr.
Atyraý oblysynyń densaýlyq saqtaý basqarmasy marqumnyń týǵan-týystaryna kóńil aıtyp, bolǵan jaǵdaı boıynsha arnaıy komısıa qurylyp jatqanyn habarlady.
«Atalǵan ota tehnıkalyq turǵydan kúrdeli ári joǵary dáldikti qajet etetin hırýrgıalyq aralasýlarǵa jatady. Mundaı otalardy jasaý kezinde, sondaı-aq otadan keıingi kezeńde medısınalyq tájirıbede belgili keıbir táýekelder men asqynýlardyń týyndaý yqtımaldyǵyn tolyq joqqa shyǵarý múmkin emes. Otadan keıin naýqastyń jaǵdaıy kúrt nasharlaýyna baılanysty medısınalyq uıym shuǵyl jáne qarqyndy emdeý sharalaryn tolyq kólemde júrgizdi. Sonymen qatar tıisti beıindi mamandar men respýblıkalyq deńgeıdegi sarapshylardyń konsýltasıalary uıymdastyryldy», — dep túsindirdi vedomstvonyń baspasóz qyzmeti.
Basqarmanyń málimetinshe, komısıa bolǵan jaǵdaıdyń mán-jaıyn, kórsetilgen medısınalyq kómektiń ýaqytyly ári sapaly bolǵanyn, sondaı-aq otadan keıin týyndaǵan asqynýlardyń sebepterin zerdeleýi tıis. Obektıvti qorytyndy daıyndaý úshin medısınalyq qujattamany táýelsiz beıindi mamandardyń qatysýymen zertteý josparlanyp otyr.
«Tekserý men saraptama sharalary tolyq aıaqtalǵansha qandaı da bir aldyn ala tujyrym jasaýǵa negiz joq. Naýqas týraly egjeı-tegjeıli medısınalyq aqparat dárigerlik qupıany saqtaý jáne derbes derekterdi qorǵaý talaptaryna sáıkes jarıa etilmeıdi», — dedi vedomstvoda.
Oqýshy qyz bıyl 11-synypqa barýy tıis edi. Ol otbasyndaǵy úlken bala bolatyn.